Impakti ndërkombëtar i jetës së shkurtër, por aq të gjallë të Janis Joplin është i pamatshëm. U lind në një familje në një qytet të vogël të Teksasit. Janis luftoi për të gjetur veten, pavarësisht kufizimeve dhe paragjykimeve të shoqërisë konservatore të asaj kohe. Lirinë e gjeti nëpër performanca dhe fitoi popullaritet falë zërit të saj në stilin Blues i cili depërtoi në thellësi të shpirtit të çdo fansi. Performancat drithëruese ngarkoheshin me emocion, gjë që e mbante audiencën të mbërthyer pas saj. Janis ndërthuri shpirtin e saj të pastër e të egër në një personalitet pompoz në skenë me pseudonimin “Perla”. Ajo vishej me tesha të thurura e të përpunuara në pëlhura luksoze të modës së nxehtë të viteve ’60 . Janis lindi si një udhëheqëse e vërtetë. Ngriti zërin kundër kufizimeve të shoqërisë dhe iu përkushtua gjeneratës së re me femra të pavarura dhe kokëforta.
Rrugëtimi brilant dhe drithërues i Janis, u ndërpre tragjikisht pak kohë para se të vinte në jetë mbesa e saj, Malyn Joplin. Malyn ishte diskrete sa i përket historive familjare, ndaj kuriozitetit të personave të ndryshëm të cilët interesoheshin për jetën plot ngjyra, por të turbullt të Janis. Duke u rritur, Malyn torturohej nga kurioziteti mbi jetën e Janis dhe trishtohej për faktin që nuk arriti ta takonte kurrë personalisht. Në kërkimet mbi jetën e saj, Malyn themeloi “Made for Pearl” si një mjet në rrugën e saj “të zbulimit”. Çdo sezon ajo dhe ekipi i “Made for Pearl”, solli një burim të ri frymëzimi me fotografi, letra personale dhe tregime të familjes, duke nxjerrë në pah shpirtin pasionant dhe të guximshëm të Janis.
Çdo siluetë, pëlhurë dhe detaj, synonte të rindërtonte imazhin autentik të Janis përmes një homazhi modern dhe të përditësuar të profilit të kësaj ikone. “Made for Pearl”, një shtëpi e re mode, u frymëzua nga copëza të jetës së Janis dhe prodhonte veshje me materiale të cilësisë së lartë të finalizuara me shumë dashuri në SHBA. Këto veshje nuk përshtaten sipas stinës apo trendeve, por krijohen mbi ndjeshmërinë e pandryshueshme dhe estetike të modës, ashtu si kundër ka qenë dhe vetë Janis Joplin. Dizajnët e “Made for Pearl” kapin vëmendjen e fansave si dhe frymëzojnë brezat e rinj në çdo sezon për të zbuluar shpirtin e pashoq të “Perlës”.
Janis Joplin kishte një stil krejt të vetin, thënë kjo në plotkuptimin e fjalës. Kur filloi karrierën e saj muzikore në San Francisco në mes të viteve ‘60, Janis nuk kishte shumë të ardhura, kështuqë buxheti i saj për veshje ishte i vogël dhe i kufizuar. Kjo ndodhi gjatë periudhës kur filloi të vishej nga dyqane me rroba të përdorura “thrift shop” si “Goodwill”. Me kalimin e kohës Joplin krijoi stilin e saj unik, një miks mes stilit “hippie” dhe atij “beatnik”. Duke eksperimentuar me gjëra të ndryshme, Janis u bë një ikonë.
Edhe gjatë performancave të saj, Janis vazhdoi të kultivonte pamjen e saj “homemade”, me bluza të bëra vetë, pantallona kadifeje e deri te syzet e saj të mëdha të rrumbullakëta. Mbi të gjitha, diva preferonte rrobat që e bënin të ndihej komode. Është parë shpesh me xhinse me shtat të ulët, kanotiera, këmisha të gjera dhe bluza të ndryshme. Joplin mbante sandale, çizme dhe besojeni ose jo, ajo argëtohej teksa rrinte zbathur. Shumë rrallë në këmbën e saj mund të shihje sandale me taka, sigurisht jo shumë të larta. Janis Joplin ishte e para që performoi zbathur, gjë që tashmë është bërë një trend për artistët e tjerë. Në vitin 1962, një artikull i gazetës “The Texan”, shkruante për Joplin: “Ajo del zbathur kur ia ndien fare për këtë.”
“Fashion News” citon: “Dola dhe bleva një palë çizme për 35 dollarë. Oh janë shumë të papara!! Një çikë “old-fashion” me modelin e tyre të ngushtë me butona para. Një e zezë FANTASTIKE! Kur të kthehem do marr me qera një makinë qepëse dhe do qep ndonjë fustan të bukur dhe të çuditshëm që t’i kombinoj me to.” – Janis Joplin, shtator 1966.
Duke u rritur suksesi i Janis, ajo u miqësua me Linda Gravenites, bashkëshorten e muzikantit nga San Francisco, Nick Gravenites. Linda ishte rrobaqepëse dhe dizenjuese veshjesh. Ajo u tregua e gatshme të krijonte disa veshje skenike për Janis. Të parat që Linda dizenjoi për Janis u bazuan në stilin e saj të mëparshëm. Performancat u bënë më tërheqëse kur Linda filloi të përdorte imagjinatën në një mënyrë më të guximshme në stil mbi pëlhura unike. Ajo filloi ta inkurajonte Janis për të përdorur sa më shumë bizhuteri dhe lëkura ekstravagante. Në këto momente Janis u kompletua në përcaktimin e saj si një ikonë kundra rrymës.
Janis shumë shpejt mësoi të dashuronte pëlhurat luksoze si satini, mëndafshi dhe kadifen. Ajo dukej shkëlqyeshëm me pelerinat dhe pantallonat e bëra me satin. Gjithashtu ishte e fiksuar me lëkurën dhe pendët. Shpesh fotografohej me xhaketa dhe kapela të tilla. Të preferuarat e saj ishin ngjyrat e pasura të gurëve të çmuar si smeraldi, bluja dhe lejlaja e errët. Mbi të gjitha asaj i pëlqenin që rrobat t’i kishte të zbukuruara me ornamente teminash.
Joplin njihet edhe për aksesorët e saj. Preferonte të vinte një numër të madh varësesh të thurura me ngjyra, të gjata dhe të shkurtra. Byzylyqe pa fund zinin dorën e saj, unaza të mëdha me gurë dhe forma të ndryshme si dhe copa e pendë të shumëllojshme i vinte në flokë. Pamja e saj kishte të bënte me ekzagjerime në gjyra, madhësi dhe forma.
Flokët e Janisit ishin gjithashtu një pjesë e rëndësishme e stilit të saj. Ka patur gjithmonë flokë të dendur dhe të padisiplinuar. Kur u rikthye në Port Arthur, pas qëndrimit të saj në San Francisco, Janis i kapi flokët në një topuz të rregullt që tregonte dhe një stil jetese më normale. Flokët e saj, si qëndrimi në Port Arthur, sigurisht që nuk mund të zgjasnin shumë. Më vonë gjatë karrierës së saj, Janis preferoi ondet e mëdha dhe të shkatërruara ku vendoste pendë me ngjyra të ndezura, për të vënë në pah më shumë volumin.
“Tani kam disa veshje të dizenjuara vetëm për mua, kisha një fustan të bukur të bërë me copëzat e mbulesës së krevatit dhe tani ajo po punon me një tyl të gjelbër me prerje jake V-ë të ulët. Tani jemi përqendruar dhe te veshjet prej lëkure. Kam një kapelë të bukur blu dhe jeshile të tipit “Garbo” dhe një palë çizme të gjelbra.” – Janis Joplin, prill 1966.
“Unë kam një palë pantallona të reja me prerje të gjerë në fund që i vesh me një palë çizme të marra borxh. Dukem shumë “in”. Ende vesh bluzën time të zezë me gold, kombinuar me një fund të zi dhe çizme të gjata, të zeza ose me një palë sandale “Levi”. Shumë të thjeshta, por kanë prezencë. Dua që audienca ime të më shohë si një performuese reale, sikur sapo doli në skenë njëri nga ne.” – Janis Joplin, August 1966
Janis ishte një përzierje e bukur ngjyrash, teksturash e melodish. Një superstar.
*Marrë nga revista “ICON” nr.3
