Kur flitet për të shpenzuar për veshjet, shqiptarët nuk hezitojnë që të kenë trendet e fundit në gardërobën e tyre. Janë gjithmonë në ndjekje të asaj që ofron muajt e fundit moda dhe gjejnë mundësinë për t’i patur edhe në çmime më të arsyeshme. Por cili nga qytetet nuk kursen aspak kur vjen puna për të shpenzuar për veshje dhe këpucë?
Nëse mendonit se në krye të listës është Tirana, atëherë na vjen keq t’ju zhgënjejmë.
Korçarët kryesojnë listën për sa i përket shpenzimeve për veshje dhe këpucë, sipas të dhënave të publikuara nga INSTAT për vitin 2017. Banorët e qarkut të Korçës shpenzuan për veshje dhe këpucë 5.7% të totalit të të gjitha shpenzimeve.
Të dytët për shpenzimet më të larta për veshje dhe këpucë renditen dibranët, ku shpenzimet për veshje dhe këpucë në 2017-n llogariten 5.2%. Si në qarkun e Korçës dhe atë të Dibrës shpenzimet për veshje dhe këpucë kanë rënë, përkatësisht me 05.% dhe 0.2%.
Qarku i Tiranës renditet i treti për shpenzimet më të larta për veshje dhe këpucë, me 4.7% të totalit. Në krahasim me një vit më parë Tirana pati rënien më të madhe të shpenzimeve për këtë grup, me rreth 1%. Më pas për shpenzime të larta renditen qarku Durrës me 4.3% të totali, Gjirokastra me 4.1%, dhe Berati me 3.9%. Me të njëjtën peshë në shpenzimet totale, vetëm 3.8%, renditet qarku Lezhës, Fierit dhe Elbasanit.
Sipas të dhënave nga Anketa e Buxhetit të Familjes 2017 shpenzimet për veshje dhe këpucë të familjeve zinin një peshë prej 4.3% të totalit, nga 4.8% që ishin një vit më parë. Në krahasim me disa vende anëtare të Bashkimit Europian, si Greqia, Danimarka, Franca apo Bullgaria, Shqipëria kishte shpenzime më të larta për veshje dhe këpucë.
Burimi: Monitor
