Lajme të mira vijnë përsa i përket lëvizjeve të qytetarëve nga dita e nesërme.
Kryeministri i vendit Edi Rama ka njoftuar që do të zgjatet fasha e orareve deri në orën 21:00 për t’u lëvizur në zonat e kuqe. Nga dita e hënë, nuk do të jetë më e nevojshme për autorizim, për lëvizjen e këmbësorëve apo automjeteve, ndërsa në fundjavë do të vazhdojë njësoj pa makina.
Edi Rama ka njoftuar gjithashtu që qyteti i Fierit është shpallur zonë e gjelbër. Por ai theksoi se është e ndaluar hyrja- dalja nga zonat e kuqe drejt të gjelbrave.
Ai ka bërë me dije edhe për rregullat e reja në television. Kryeministri njoftoi që nga dita e nesërme do të lejohet që në studio TV të ketë më shumë të ftuar, por me një hapësirë prej 2 m distancë nga njëri- tjetri.
Postimi i plotë i Edi Ramës:
“Nga nesër për javën në vazhdim, në bazë të vendimit të Ministrisë së Shëndetësisë:
Fieri kthehet në zonë e gjelbër
Hiqet krejtësisht fasha orare e lëvizjes në zonat e gjelbërta
Fasha orare e lëvizjes në zonat e kuqe zgjatet deri në orën 21.00
Hiqen në të gjithë vendin autorizimet për lëvizjen e këmbësorëve apo automjeteve.
Vazhdon të jetë e ndaluar hyrje – dalja e automjetevenë zonat e kuqe.
Qeveria do të ndryshojë nesër aktin normativ për heqjen e ndalesës së studiove tv për të ftuar jo më shumë se një person. Do të mbetet vetëm kushti që të ftuarit të vendosen në distancë 2m nga njëri – tjetri
Miq, me heqjen e të gjitha autorizimeve të lëvizjes, ekspozimi ndaj infeksionit rritet shumë dhe barra e çdo individi për të ruajtur veten e të tjerët gjithashtu!
Ju lutem bëni më të mirën tuaj si deri tani dhe kujdes në mënyrën më të veçantë më të moshuarit e të sëmurët në familjet tuaja, të cilët duhet të vetëkufizojnë daljet maksimalisht
*Masa 14 ditore për të vetëkarantinuarit nuk ndryshon dhe shkelja e saj ndëshkohet nga ligji dhe Kodi Penal”
