Punëtorët e Ministrisë së Punës dhe Mirëqenies Sociale, në Mitrovicë pretendojnë se në objektin ku punojnë dëgjohen disa zëra, që vijnë nga fantazmat.
Rasti është denoncuar edhe në polici, por, këta të fundit siç kanë deklaruar për “Express” “nuk kanë njësi që merret me fantazma”
Dy javë më parë, në orët e mbrëmjes policinë e Mitrovicës e lajmëruan punëtorë të sigurimit që ruajnë në objektin e Ministrisë së Punës dhe Mirëqenies Sociale në këtë komunë.
“I kemi dëgjuar disa zëra, po na vjedhin gjërat, po na humbin. Janë shfaqur shpirtrat e vdekur, ose s’po e dimë as çka janë. Mund të thërrisni policinë ju tregojnë rastin më mirë”, kanë deklaruar disa prej punonjësve.
Të shqetësuar ata lajmëruan policinë se në këtë objekt kanë dëgjuar disa zëra e britma që nuk e dinë se nga vijnë.
“E kemi pranuar një informacion të tillë prej sigurimit. Policia ka shkuar në vendin e ngjarjes, mirëpo, nuk ka ndërmarrë diçka pasi nuk është çështje që trajtohet nga policia”, ka deklaruar zëdhënësi i këtij rajoni, Avni Zahiti.
Në videot e publikuara nga mediat, thuajse nuk mund të vërtetohet asgjë!
