Mbrëmjen e sotme në emisionin e gazetares Eni Vasili është bërë i ditur rasti i një çifti nga Skrapari.
Vajza, dyshohet se është e infektuar nga koronavirusi, ndërsa partneri i saj e ka dërguar në spital me makinën e tij duke refuzuar ambulancën.
I riu tha se nga spitali i Skraparit i ishte ofruar ambulanca, por ai kishte refuzuar sepse dëshironte ta shoqëronte të fejuarën e tij.
Sapo kanë mbërritur te Spitali Infektivi, dy të rinjtë kanë qëndruar për disa minuta në ambientet e jashtme duke pritur për të bërë analizat.
Vajza e cila dyshohet për koronavirus u shpreh se ka temperaturë por jo bllokim të rrugëve të frymëmarrjes.
“Kam temperaturë 38.5 gradë, 39, por tani më është ulur pak. Më ka shkuar në 38. Nuk kam probleme me frymëmarrjen”, u shpreh vajza.
Ndërkohë, u vu re se i fejuari i cili shoqëronte partneren mbante maskë në fytyrë, kurse e dyshuara për koronavirus nuk kishte maskë.
