Pas ankthit të luftës në Afganistan, duket se tani shtetasit afganë kanë gjetur qetësinë në vendin tonë.
Në strukturat hoteliere të Shëngjinit po qëndrojnë mbi 400 shtetas afganë, të cilët po kalojnë ditët e tyre të qeta pas ferrit të përjetuar në Kabul.
Prej katër ditësh e strehuar në këtë qytet bregdetar, Fatima Ibrahimi ka treguar për televizionin “Top Channel” se tanimë po ndihet e sigurt dhe e qetë.
“Kam lindur në provincën e Daykundit, por kam jetuar në Kabul. Kam studiuar Bachelor për ekonomik dhe kam punuar në disa shoqata si financiare. Erdha këtu dhe gjeta një qytet të qetë. E dua këtë qytet“.
Pothuajse si të gjithë afganët e tjerë, edhe ajo e shikon Shqipërinë si një vend i përkohshëm për të jetuar pasi sipas saj arsyeja për këtë mbetet sfida e gjuhës.
“Ne duam të ikim në një shtet tjetër, ku gjuha që flitet të jetë anglishtja. Sepse është shumë e vështirë të mësosh një gjuhë të re. Gjëja e vetme e vështirë në Shqipëri është sfida e gjuhës”.
Ndër të tjera ajo shprehet se mendimet e saj janë në Kabulin e pushtuar nga talebanët, aty ku kanë mbetur motra e saj e vogël dhe prindërit.
Teksa talebanët po qeverisin vendin në ligjet e sheriatit, Fatima shprehet tepër e shqetësuar për të ardhmen e grave afgane dhe familjes së saj atje.
