Tani që jemi në periudhën kur alkooli mund të konsumohet më shumë se kurrë, duhet të bëjmë kujdes të madh.
“Alkooli jep kalori, kaloria jep mbipeshë. Ky është efekti negativ. Në rastet që personat janë drejtues automjetesh, ose janë në shërbime, nuk duhet të konsumojnë alkool”, thotë Roland Shuperka, specialist i ISHP.
Ekspertët thonë se në Shqipëri, shifrat e personave që konsumojnë alkool kanë ardhur në rritje.
“Ka një rritje të nivelit të alkoolpirësve edhe në vendin tonë. Konsumojnë më tepër burrat se gratë. 19 % e popullsisë përdorin alkool tej normave. Dhe nga këta 1.5 % janë të varur nga alkooli. Konsumi më i madh i pijeve alkoolike shënohet në birra”, tha Shuperka për televizionin Klan.
Sipas ekspertëve të shëndetësisë botërore, konsumimi i alkoolit mbi normat e lejuara, është shkaktare e më shumë se 200 sëmundjeve, mes të cilave edhe dëmtimi i mëlçisë dhe kancerit.
Të dhënat e fundit të Organizatës Botërore të Shëndetësisë kanë nxjerrë në çdo ditë 800 persona vdesin në Europë nga përdorimi i tepërt i alkoolit, ndërsa e konsiderojnë atë shkaktar të 10,8 % të vdekjeve.
