Jolanda Dhamo është një nga këngëtaret më të kërkuara shqiptare për interpretimin e muzikës live në klube të ndryshme. Dhe ashtu si pjesa më e madhe e këngëtarëve edhe natën e ndërrimit të viteve ajo detyrohet ta kalojë larg familjes që të performojë para publikut.
Prej disa vitesh këngëtarja jeton në Greqi, por vitin e kaluar kishte vendosur të këndonte për Natën e Vitit të Ri në Shqipëri.
Por ajo natë nuk shkoi siç duhej për këngëtaren shqiptare…
E ftuar sot tek “Rudina” Jolanda tregoi historinë e dhimbshme që përjetoi në natën e Viti të Ri, kur bashkëshorti i saj, Arqile u nda nga jeta duke lënë një boshllëk të madh në jetën e saj.
Mes dhimbjes e lotëve ajo ndau sot me të gjithë trishtimin e madh që ndjen për humbjen e papritur të bashkëshortit.
“Unë përgatitesha për një koncert në Durrës. Po bëja grimin dhe si për dreq flokët nuk po më merrnin ngjyrë edhe pse kisha bërë disa përpjekje. Ishte hera e parë që më ndodhte. Pastaj i them mikeshës sime që doja të haja diçka të ëmbël. Ishte një parandjenjë dhe isha shumë nervoze. Po haja bakllava për qejf, kur më ra telefoni nga një numër që nuk e kisha të regjistruar. Ishte kunati. Më pyeti “Lola, si je?” I thashë: “Mirë, çfarë ka ndodhur?” Dyshova se kishte ndodhur diçka se ai nuk më fliste në atë mënyrë, por më tha se Arqileja është shumë rëndë…” – tregoi këngëtarja e përlotur.
Por në të vërtetë ai kishte vdekur nga një atak kardiak dhe këtë Dhamo e mësoi pasi arriti në Greqi.
“Ishin mbledhur njerëzit. Në Greqi, trupi nuk merret në shtëpi. 6 ditë nuk ia pamë dot trupin, ishte shumë e dhimbshme ta qaje ndërkohë që trupi ishte në morg” – u shpreh më tej ajo.
“Nuk kam humbur bashkëshortin, kam humbur njeriun më të mirë të jetës sime. Ishte motër, vëlla, me të qaja të gjitha hallet. Ishte mbështetje ime më e madhe. Ishte shumë pozitiv dhe gjithmonë i gatshëm për të përballuar çdo vështirësi timen” – tha Jolanda për bashkëshortin e ndjerë.
Gjithashtu këngëtarja tregoi se dhimbja ishte mjaft e madhe edhe për të birin, i cili jeton në SHBA dhe pa babanë e tij t’i vdiste ndër duar.
Dhe pavarësisht se sa shumë i mungon bashkëshorti, Dhamo tha se tani po jeton me kujtimet e tij dhe po gjen kurajon t’i japë forcë të birit.
Por mes asaj dhimbje të madhe, këngëtarja e njohur tregoi edhe për humbjen e kushëririt të saj, djalin e aktores së mirënjohur Tinka Kurti, i cili ndërroi jetë në moshë të re si pasojë e një ataku kardiak në Kanada.
Tashmë ajo thotë se në Shqipëri kanë mbetur vetëm ajo dhe tezja e saj , Tinka Kurti , për të cilën këngëtarja rrëfen se është e fortë dhe madje përpiqet t’i japë forcë edhe asaj.
