Pavarësisht se ndodhen në qeli për dënime të ndryshme, besimi është ai që i bashkon 13 gratë. Liljana Boro është një prej tyre, e cila vuan prej 12 vitesh dënimin për vrasjen e nipit e mitur të ish-të dashurit të saj, 8-vjeçarit Alberto Xhihanit.
Boro prej 8 vitesh i ka hyrë besimit. Ajo është kujdesur që iftarin ta çelë me hurma, pikërisht siç udhëzohet.
“Agjërimi është një nga 5 shtyllat e islamit. Jam shumë besimtare. Në jetën time ka ndodhur një fatkeqësi. Fëmijet e mi u bënë shkak që të besoja, edhe pse ata janë në atë botë, mami i ka ata gjallë”, thotë Liljana për “Top Channel”.
Liljana po vuan dënimin me 25 vjet burg për vrasjen e fëmijës në fshatin Vidohovë, krim i cili tronditi shoqërinë vite më parë pas gjetjes së trupit në një pus. Gjatë kësaj kohë asaj i vranë tre djemtë e saj.
“Kur kam qenë jashtë nuk e kam njohur Zotin, se po ta kisha njohur Zotin nuk e kisha bërë atë gjë, se besimi të mban larg nga gjërat e këqija dhe këtë dua t’u them njerëzve. Edhe këtë agjërim i lutem Zotit të dal jashtë këtyre dyerve”, rrëfen ajo për “Top Channel”.
