Prej një viti, 22-vjeçarja Anxhela Noçka, ishte në një betejë me sëmundjen e rrallë të leucemisë, prej të cilës humbi jetën mbrëmjen e djeshme. Pasi u diagnostikua me Lymphomablastic Iymphoma, një formë agresive e kancerit të gjakut, studentja e arkitekturës qëndroi rreth një vit e shtruar në spital.
“Bëje për Anxhin”, ishte nisma e nisur nga të afërmit dhe shoqëria e saj, që bashkoi qindra qytetarë, biznese dhe institucione shtetërore. Qëllimi i të gjithëve ishte t’i krijonin asaj mundësinë e kurimit në një qendër të specializuar në Hungari.
Por me gjithë përpjekjet për ta mbajtur në jetë, Anxhela u largua nga jeta mbrëmjen e djeshme në një spital të Budapestit, ku po mjekohej.
Familjarët e Anxhit mes dhimbjes kanë falënderuar të gjithë ata që ndihmuan dhe kontribuuan, që ajo të jetonte.
Ceremonia mortore për t’i dhënë Anxhela Noçkës lamtumirën e fundit do të mbahet, pasi trupi i saj të mbërrijë në Shqipëri.
