Një 9-vjeçar me sindromën Down, ka gjetur sërish lumturinë pranë gjirit të një familjeje shkodrane, pasi nëna e tij e vërtetë e braktisi në maternitet kur lindi.
Një djalë i ri është afeksionuar aq shumë me vogëlushin, saqë bashkë me familjen kanë vendosur ta adoptojnë djalin e quajtur Domenik.
Domeniku, ose Dominushi, siç i thërret Serxhio me përkëdheli, është tashmë pjesë e pandarë e jetës së tij dhe e sheh si një vëlla të vogël.
Në një intervistë për “Newsbomb” ai ka treguar se, është njohur me vogëlushin kur punonte si vullnetar te “Motrat e Nënë Terezës”.
“Normalisht nuk më lejohej ta merrja Domenikun por motrat duke më njohur prej vitesh dhe duke qenë se punoja vullnetar aty, ma lejuan. Iu luta motrave të ma besonin dhe e mora për pak orë në shtëpi”.
Dhe kështu Serxhio, 23 vjeç, filloi të afrohej edhe më shumë me vogëlushin, deri sa vendosën si familje që ta adoptonin. Por këtu pati një problem:
“Pastaj na vjen një lajm që nuk mundën ta adoptonin për disa arsye, dhe se kishte ardhur një familje amerikane për ta adoptuar. Nisën procedurat… Erdhën disa ekspertë nga Tirana dhe kërkuan të ishin me mua dhe me time më për të ditur më shumë rreth Domenikut që pastaj të vendosnin për t’ia dhënë familjes amerikane. Unë dhe mama u futem në një dhomë e ndërsa filluam të flisnim për Domenikun, nisëm të qanim”.
“Pikërisht në atë moment u thamë ekspertëve se donim ta adoptonim ne Domenikun. Nisëm menjehërë nga procedurat dhe ata pasi panë edhe lidhjen e tij me ne, vendosën në fund të na e besonin”.
Me ëmbëlsinë e tij, Domeniku u ka hyrë në zemër të gjithë të afërmve të Serxhios, dhe më në fund e ka gjetur familjen e tij edhe pse jo të një gjaku.
Burimi: “Newsbomb”
