Dita e sotme shënon dy vite nga tërmeti tragjik i 26 nëntorit, ku humbën jetën 51 persona. Lëkundjet e forta me magnitudë 6.4 të shkallës rihter goditën Durrësin, Thumanën, Tiranën e qytete të tjera të vendit rreth orës 03:56 të mëngjesit. Qindra mijëra njerëz u prekën nga tërmeti, teksa qindra banesa u shkatërruan dhe lanë shumë të pastrehë.
Lëkundjet zgjatën rreth 50 sekonda dhe u pasuan nga paslëkundje të tjera që u ndjenë në një pjesë të madhe të vendit. Qindra ndërtesa u shembën duke zënë poshtë qytetarë, pak prej të cilëve ia dolën të mbijetonin për orë të tëra nën rrënoja. Qytetarët, shtetet fqinje e shtet të tjera ofruan menjëherë ndihma dhe u mobilizuan në mbështetje të personave që u prekën nga tragjedia.
Midis viktimave të tërmetit kishte edhe fëmijë të moshave 2-10 vjeç. Tragjedia e 26 nëntorit vijon të mbetet ende e freskët në kujtesën e shumë personave, teksa vlen për të mos harruar se jetën dhe vdekjen i ndan vetëm një sekondë.
Ende pas dy vitesh shumë njerëz janë ende pa një shtëpi, ndërsa procesi i rindërtimit vijon. Ditën e djeshme u bë me dije se pritet t’iu shpërndahen bashkive në vend rreth 6 miliard lekë grante të tjera rikonstruksion. Nuk dihet si janë menaxhuar fondet e rindërtimit, përderisa bashkitë do të marrin sërish grante për një process që është i vonuar. Ndërkohë, për dimrin e tretë me radhë, shumë njerëz do vuajnë të ftohtin dhe acarin pa një çati mbi kokë.
