Dy spitale të tjera do të shtohen në Qendrën Spitalore “Nënë Tereza”, për të cilat tashmë është filluar puna. Një prej tyre do të jetë për sëmundjet e brendshme dhe tjetri do t’i kushtohet kirurgjisë. Investimi për dy spitalet do të arrijë vlerën 25 milionë eurove dhe punimet do të zgjasin 30 muaj.
Kryeministri Edi Rama dhe ministrja e Shëndetësisë, Ogerta Manastirliu, ishin të pranishëm sot në çeljen e kantierit të punimeve.
“Pas 30 muajsh do të kemi një spital të ri të sëmundjeve të brendshme me 345 shtretër dhe 14 shërbime. Në këtë spital do të jetë dhe shërbimi i urgjencës polivalente pa zhvendosur pacientin. Risi do të jetë dhe spitali ditor me 60 shtretër, që nuk kanë pse të rrinë me ditë në spital. Në vetëm 9 muaj nga sot do të kemi një spital të ri kirurgjie, modern, me kapacitet mbi 1,000 shtretër”, deklaroi Ogerta Manastirliu për mediat.
Duke folur për spitalin e ri që do të jetë për kirurgjinë, Rama tregoi se ai është projektuar të ketë 120 shtretër dhe 7 salla operacionesh. Kryeministri u shpreh se gjithashtu qendrës spitalore do t’i shtohet edhe një parking modern. Nga ana tjetër ai premtoi se, qeveria do të rrisë pagat për infermierët dhe mjekët që shërbejnë te “Nënë Tereza”.
“Shumica e bluzave të bardha janë zemra e këtij sistemi dhe shpëtojnë jetë njerëzish. Duke qenë të vetëdijshëm, do të investojmë për rritje pagash në vitin që hyjnë për gjithë trupin, mjekë, infermierë”, u shpreh Edi Rama.
Burimi: Shqiptarja.com
