Ceremonia e ndarjes së çmimeve International Emmy Awards u mbajt, si gjithmonë në hotelin “Hilton” të Nju Jorkut. Eventi u mbajt vetëm pak javë pas zgjedhjeve presidenciale dhe fitores befasuese të Donald Trumpit, të cilën manjati e kremtoi pikërisht në të njëjtin hotel. Një detaj i tillë nuk u shpëtoi as të ftuarve.
“Në rast se nuk e dinit, e ndiej si detyrim moral t’ju informoj se në datën 8 nëntor, ky holl u kthye në vendin e njërit prej momenteve më të errëta, më negative dhe absolutisht shkatërruese në historinë e këtij vendi. Për këtë arsye, mbrëmja e sotme nuk shërben vetëm për të ofruar çmime ekselence, por edhe për t’u shkëputur nga energjia negative dhe fanatizmi”, tha aktori Alan Cumming.
Produksionet gjermane dhe ato britanike mbizotëruan mbrëmjen me nga tre Emmy secili. Gjermanët çuan në shtëpi trofetë e aktores më të mirë, dokumentarit dhe dramës më të mirë, ndërsa anglezët rrëmbyen çmimin e aktorit më të mirë, komedisë dhe filmit më të mirë televiziv.
Në kategorinë e telenovelave, i pathyeshëm rezultoi Brazili, ndërsa në artin e programimit, Japonia. Ceremonia e çmimeve “Emmy” nderon arritjet më të mira në industrinë e televizionit, ndërsa këtë vit akademia kishte ndarë dhe dy çmime speciale: njëri ishte për shefen ekzekutive të “Danish Broadcasting Corporation”, Maria Ronn dhe tjetri i shkoi producentes ekzekutive të “Grey’s Anatomy”, Shonda Rhimes.
Lista e fituesve:
Arti i programimit: The Man Who Shot Hiroshima (Japoni)
Performanca më e mirë nga një aktor: Dustin Hoffman te “Roald Dahl’s Esio Trot” (Britani e Madhe)
Performanca më e mirë nga një aktore: Christiane Paul te “Unterm Radar” (Gjermani)
Komedia: Hoff the Record (Britani e Madhe)
Dokumentari: Krieg der Lügen (Gjermani)
Dramë: Deutschland 83 (Gjermani)
Programi më i ndjekur jo anglisht: Francisco, El Jesuita
Argëtim pa skenar: The Great Swedish Adventure (Suedi)
Telenovela: Hidden Truths (Brazil)
Mini-serial televiziv: Capital (Britani e Madhe)
Burimi: Hollywood Reporter
