Ajo nuk është prezantuar ende si imazh nga Banka e Shqipërisë, por shumë shpejt do të kemi mundësi të shohim kartëmonedhëm më të madhe shqiptare që del në tremujorin e fundit të vitit 2020.
“Monitor.al” shkruan se sipas vendimit të Këshillit të Mbikëqyrjes, kjo kartëmonedhë do të pasqyrojë figurën e poetit të njohur shqiptar, Asdrenit, kombinuar me simbolet figurative të ‘Flamurit Kombëtar’, si dhe një varg të zgjedhur nga ‘Himni Kombëtar’, ‘Rreth flamurit të përbashkuar/me një dëshir’ e një qëllim’.
Vitin e kaluar Banka e Shqipërisë nisi prezantimin e serisë së re të kartëmonedhave, që ka 6 prerje, 200, 500, 1000, 2000, 5000 dhe prerjen e re 10000 Lekë.
Kartëmonedhat 200 lekë dhe 5000 lekë u hodhën në qarkullim duke filluar nga data 30 shtator 2019, ndërsa këtë vit do të hidhen në qarkullim kartëmonedhat 10,000 lekë dhe 1,000 lekë duke filluar tremujori i fundit i vitit.
Kartëmonedhat e reja janë prodhuar me qëllim forcimin e elementeve të sigurisë dhe njëkohësisht përmirësimin e dizajnit, një praktikë e njohur në bankat qendrore, që përgjithësisht zbatohet çdo 15-20 vjet. 
