Turqia nuk gjen qetësi. Një tërmet me magnitudë 6.4 goditi rajonin kufitar midis Turqisë dhe Sirisë ditën e sotme, vetëm dy javë pasi dy tërmete të fuqishme goditën zonën dhe vranë më shumë se 46,000 njerëz në të dy vendet.
Agjencia turke e menaxhimit të fatkeqësive Afad njoftoi se epiqendra ndodhi në Defne të provincës Hatay, i njëjti rajon që u godit në fillim të këtij muaji.
Ende nuk ka raportime për dëmet e shkaktuara nga kjo lëkundje, ndërsa priten përditësime mbi situatën në vazhdim.
Numri i viktimave nga tërmetet ka kapur shifrën e 47 mijë viktimave e mbi 80 mijë të plagosur. Në pjesën më të madhe të zonave të goditura kërkimet janë mbyllur, ndërsa vijojnë vetëm në 15 ndërtesa të Hatayit. Sekretari amerikan i Shtetit, Antony Blinken premtoi 100 milionë dollarë të tjera ndihmë pasi vizitoi rajonin e goditur nga katastrofa. Bashkimi Europian ka njoftuar datën 16 mars për mbajtjen e konferencës së donatorëve në ndihmë të Turqisë.
