Shtrimet në spital të personave me koronavirus janë rritur 50% në Gjermani kohët e fundit, e duket se epidemiologët fajësojnë pjesërisht dy filma.
Sipas tyre, “Barbie” dhe filmi për fizikantin “Oppenheimer” janë fajtorë për shtimin e rasteve.
Epidemiologët gjermanë, raporton “ The Guardian”, po paralajmërojnë se po shohim një valë verore të infeksioneve Covid, duke fajësuar pjesërisht tubimet masive siç quhen tashmë shfaqjet “Barbenheimer”.
Gjermania ishte një nga vendet ku shikuesit e filmave inkurajoheshin të shikonin filma në shfaqje të dyfishta në një përpjekje për të mbështetur kinematë, të cilat nuk janë rikuperuar nga pandemia.
Deri më tani në Gjermani, filmin Barbie e kanë parë rreth 4 milionë njerëz dhe “Oppenheimer” mbi 2.5 milionë.
Të qenit pa maskë në një dhomë të mbyllur me qindra njerëz të tjerë për orë të tëra është një mjedis ideal për përhapjen e virusit.
Agjencia qeveritare e kontrollit të sëmundjeve, Instituti Robert Koch (RKI), thotë se ndërsa infeksionet mbeten të ulëta në krahasim me kulmin e pandemisë, ato janë rritur në muajin e kaluar. Statistikat e fundit tregojnë se vizitat tek mjeku për shkak të infeksionit Covid 19 janë shumëfishuar muajin e fundit. Një pasqyrë e ngjashme tregojnë edhe matjet në ujërat e zeza të qyteteve, me rritje të ngarkesës virale.
Zyrtarisht incidenca është e ulët – vetëm 3 në çdo 100,000 njerëz – por numri vështirë se pasqyron shkallën e vërtetë, pasi tani ka pak teste.
