Dy ditë më parë, portali “Dosja.al” zbuloi një tender rrufe të Ministrisë së Shëndetësisë, për blerjen e respiratorëve në kuadër të krizës COVID-19 në Shqipëri.
Pas diskutimeve të shumta mbi kapacitetin e sistemit tonë shëndetësor për të përballuar këtë epidemi, tenderi 24-orësh me një fond limit prej 129, 727.371 lekësh për blerjen e respiratorëve, sipas përllogaritjeve të “iconstyle.al” supozohet të sigurojë mesatarisht 30 respiratorë, një shifër e papërfillshme duke marrë parasysh përhpajen që pritet të ketë koronavirusi në vendin tonë (lexo këtu).
Por megjithatë, ndonëse procedurat janë kryer me një shpejtësi rekord dhe situata është mëse e nderë, institucionet publike nuk kanë arritur të bëjnë transparencë lidhur me tenderin në fjalë.
Ashtu sikurse shihet në dokumentat e publikuara nga “Dosja.al”, afati përfundimtar i pranimit të ofertave ishte data 18 mars, ora 17:00.
Megjithatë, ndonëse supozohet që procedura tashmë të ketë përfunduar dhe të jetë përzgjedhur fituesi i tenderit, as Agjencia e Prokurimeve Publike dhe as Ministria e Shëndetësisë nuk kanë publikuar asnjë të dhënë lidhur me tenderin në faqet respektive online.
Ministria e Shëndetësisë vijon të mbajë sekret çdo të dhënë lidhur me kapacitetin e sistemit tonë shëndetësor për përballimin e kësaj epidemie, si për llojet e sasitë e medikamenteve që po përforen në këtë luftë, ashtu edhe për pajisjet si respiratorët e ventilatorët që janë të domosdoshëm për pacientët që paraqesin komplikacione të rënda pas prekjes nga COVID-19.
Kjo mungesë transparence vjen në një moment kur sytë e të gjithëve janë të kthyer nga institucionet e shëndetësisë dhe ndonëse “iconstyle.al” ka kontaktuar përfaqësuesit e Ministrisë së Shëndetësisë lidhur me këtë çështje, nuk ka marrë ende asnjë përgjigje.
/iconstyle.al
