Me afrimin e sezonit të turizmit, situata me pandeminë do t’i gjejë në krizë ekonomike shumë bare dhe restorante të cilat kanë qenë mbyllur gjatë dy muajve të fundit.
Qeveria ka paralajmëruar hapjen e tyre pas 18 majit, por bëhet fjalë për restorantet dhe baret e hapur në natyrë, çka nënkupton se një pjesë e madhe e tyre do të nisin modifikimet për t’u përshtatur me rregullat e reja dhe rrjedhimisht me shpenzime të mëdha.
Ndaj për Zak Topuzin, kryetar i sektorit të hoteleve, nevojitet një paketë e tretë për baret dhe restorantet, të cilët janë goditur dhe do të goditen nga pandemia e koronavirusit.
I ftuar mbrëmjen e djeshme në emisionin ‘Real Story’ në News24 ai u shpreh se kredia duhet lëvruar sa më shpejt, pasi sta nuk mund të përballojnë qeratë e shtrenjta apo TVSH-të.
Sipas Topuzit, Shqipëria zë vendin e parë në sektorin e restoranteve në Ballkan dhe ky status duhet ruajtur edhe gjatë pandemisë.
“Kjo është njësoj si lufta. Kemi shkuar në luftë, dhe është e pamundur që të rezistojë pa të vdekur, pa të falimentuar. Ndaj bota, rekomandon disa masa për ekonomë, që është motor i përgjithshëm. Ndaj duhet të implementohet urgjent një paketë. Jemi në momentet ku fillimi i qershorit të jetë fillimi i turizmit. Duhet të bësh kuzhina ndihmëse, të modifikosh baret. Ndaj është me rëndësi që kjo kredi të lëvrohet shpejt. Në këtë sektor është me rëndësi pjesa e bareve restoranteve. Ne jemi pjesë e Shoqatës Ballkanike të Hoteleve dhe Restoranteve e bareve, ku Shqipëria zë vendin e parë në 10 vite. Jemi në vendet e para të restoranteve dhe ia marrin dhe Greqisë. Jemi në vend të dytë për baret, pasi vendin e parë e zë Greqia. Ky është sektor i goditur. Në paketa e tretë duhet të përfshirë dhe baret dhe restorantet. Janë goditur dhe do goditen nga kjo pandemi, nga distancomi. Kanë ambiente me qira jashtëzakonisht të shtrenjta. Duhet të përfitojë ky sektor për uljen e TVSH-ve”, pohoi ai.
Sektori i turizmit, është ndër më të goditurit pas situatës me pandeminë e koronavirrusit.
Në masat e marra kreu i qeverisë ka treguar se do të përfitojnë agjencitë turistike që bëjnë pjesë në biznesin e vogël, gjithashtu ka menduar edhe për pagat e punonjësve të restoranteve.
Por e vërteta është se një pjesë e bizneseve mund të mos jenë në gjendje të hapin dyert dhe masat e qeverisë janë pa mjaftueshme. Shumë restorante dhe hotele, janë drejt shpalljes së falimentit. Ata e quajnë këtë vit turistik një sezon për të mbijetuar, me shpresën që të paktën të mbulojnë kostot e punës.
/BalkanWeb
