Shpimi i veshëve te fëmijët për të vendosur vathë duket se është një çështje shqetësuese për shumë prindër britanikë. Një peticion kundër kësaj tradite mblodhi më shumë se 36,000 firma.
Lëvizja nisur nga Susan Ingram, i kërkon ministrit britanik të shtetit për Fëmijët dhe Familjet, të vendosë kushtin e një minimumi moshe për vathë në vesh dhe ta bëjë të paligjshme këtë praktikë, për prindërit e foshnjave dhe fëmijëve të vegjël.
“Është një formë keqtrajtimi për fëmijët. Atyre iu shkaktohet dhembje e fortë dhe frikë pa qenë e nevojshme. Kënaqet vetëm vaniteti i prindërve. Meqë format e tjera të dëmtimit fizik të fëmijëve janë të paligjshme, kjo nuk duhet të jetë ndryshe,” përshkruan Ingram në peticion.
Mbështetësit kanë lënë komente duke e quajtur shpimin e veshëve abuziv, vanitoz dhe të panevojshëm.
Ka dhe nga ata që e quajnë kundërshtimin e hapjes së vrimave të veshëve për vëthë te fëmijët, qesharak.
Po a është shpimi i veshëve i dëmshëm për një fëmijë? Sipas Akademisë Amerikane të Pediatërve AAP , nëse vathët bëhen në një mjedis steril dhe tregohet kujdes, ka pak rrezik.
