Përballja e kryeministrit Edi Rama me studentët dy ditë më parë u diskutua shumë për faktin që të rinjtë ishin zgjedhur nga vetë ai.
Rrjetet sociale u mbushen me tema “Rama përballë FRESH-istëve” duke i evidentuar të rinjtë si të lidhur me politikën e Ramës.
Ndaj moderatori Alban Dudushi ka sqaruar në një intervistë për “Open” se ku i gjeti dhe si u përzgjodhën studentët për t’u përballur me kreun e qeverisë.
Dudushi tha se kishin aplikuar 400 vetë për të qenë përballë kreut të qeverisë dhe gazetarët kishin marrë në telefon 150 vetë.
“Gazetarët e mi kanë marrë në telefon 150 veta. Janë 150 telefonata të bëra për të dalë ata 90 veta që u shfaqën në studio atë natë. Kështu që, unë nuk jam shef kuadri dhe nuk mund të kontrolloja çdonjërin i kujt partie ishte, por edhe sikur të ishte i FRPD-së, apo i LRI-së, apo i FRESSH-it, unë prapë nuk do t’i thoja mos hajde sepse e kisha thirrur si student dhe jo si anëtar organizate”.
Ai mohoi se është shpërblyer në njëfarë mënyre nga Rama për emisionin që i dedikoi dialogut dhe u shpreh se studentët e përzgjedhur përfaqësonin vetveten.
“Unë besoj që çdo student ka të drejtën të përfaqësohet ose të mos përfaqësohet. Ka të drejtën të rrijë vetëm atje (përballë Kryeministrisë) apo të vijë dhe t’i rrijë përballë zotit Rama. Në studiot televizive nuk bëhet dot as marrëveshje, asgjë. Ka përballje. Unë një pjesë të mirë të atyre studentëve i kam kontaktuar vetë dhe një natë më parë kanë qenë gati të dalin përballë Ramës. Mirëpo, si u majis situata dhe si u ndërtuan presionet midis studentëve, ata u tërhoqën sepse nuk donin të përjashtoheshin nga lëvizja.
Këta përfaqësojnë vetveten dhe derisa nuk kanë një grup që t’i përfaqësojë dhe nuk kanë një grup që merr vendime teksa të tjerët i miratojnë, atëherë ka të lirë që duan të dalin. Dhe fundja fundit, nuk bënë asnjë tradhti sepse folën për të njëjtat gjëra që folën dhe studentët para Kryeministrisë. Unë nuk jam nga ata që as shitem, as blihem, as përdorem. Ajo çfarë është bërë aty nuk ka qenë produkt i Edi Ramës, ka qenë produkt i ‘Top Show’”.
