Familjarët e pacientëve të shtruar tek spitali Invektiv janë në ankth për jetën e tyre, pasi askush nuk po i lajmëron se çfarë po ndodh pas dyerve të spitalit.
Maksi Rama i cili ka vjehrrën të shtruar në Infektiv, është në pritje të informacioneve bashkë me bashkëshorten, ndërsa e vetmja gjë që iu është komunikuar është se e afërmja e tyre është përkeqësuar.
Vjehrra e tij ndodhet prej tetë ditësh e shtruar në spital, ndërsa 3 ditët e fundit gjendja e saj është përkeqësuar dhe stafi mjekësor e ka intubuar. Ai nuk ka besim të bluzat e bardha dhe thotë se nëse nuk ju jep lekë, nuk të japin asnjë gotë ujë.
“Kam vjehrrën. Po bën 8 ditë që është shtruar. Nuk po di me kë të lidhem se po jep shpirt këtu. Është gjendje të keqe, por për çfarë ka vajtur ne gjendje të keqe këtë nuk e kuptojmë. Ka pasur siklete me zemrën. Tani me këtë sëmundjen e famshme, e kanë nxjerrë pozitiv. E kanë hedhur këtu dhe thonë që gjendja është përkeqësuar. Ankohet para tre ditësh që thoshte s’më kanë dhënë ujë. Ishte në vetëdije, tani nuk flet më. Para tre ditësh kam folur, tani jo. E kanë vënë në intubim. Më përpara ishin këto infermierët nëpër cepa na jepnin informacion. Po bëjmë tre ditë që nuk po merremi vesh fare. I bënin presion edhe asaj që ishte mirë aty brenda. Qëndroj në hotel me lekë. Nusja ka gati 8 ditë këtu. Kërkoj vetëm ta marr njeriun dhe ta çoj në shtëpi, të japë shpirt. Po e vdesin njeriun me zor këtu. Këtu vetëm jep lekun dhe të japin një gotë ujë. Me këta nuk bëhet përpara”, shprehet ai.
