Këngëtarja me famë botërore, Dua Lipa do të nderohet edhe njëherë në vendin e saj të lindjes. Kësaj here nga posta e Kosovës, e cila ditën e nesërme do të promovojë Pullën Postare me emrin e saj.
Lajmi është bërë i ditur nga shefi i Administratës dhe Protokollit, njëkohësisht kryesuesi i komisionit për aprovimin e pullave postare, Kamber Demaku.
Kujtojmë se Dua Lipa ka folur shqip ditën e djeshme, në një konferencë për median para nisjes së “Sunny Hill Festival”.
Ajo ka treguar se ndihet shumë e lumtur që ndodhet në Prishtinë dhe mezi po pret që të performojë këngët e saj.
“Do të jetë befasi, është diçka shumë special që është krijuar vetëm për këtë performancë, është një ndjesi shumë e mirë që të performoj në Prishtinë, nuk ka ndjenjë më të mirë, energjinë që ma jep, mezi pres me i ndje ato emocione para se të dalë në skenë”, ka thënë Dua.
Më tej, Dua shtoi se tashmë vëmendja e saj më e madhe është vetëm te performanca si dhe shpreson që të gjithë të kënaqen.
“Dua vetëm të falënderoj të gjithë për ndihmën, energjinë dhe dashurinë që na jepni në këto ditë dhe mbështetjen për fondacionin që e kam shumë për zemër, ndjehem krenare që jam këtu, vëmendjen e kam patur vetëm të performanca, shpresoj që do të iu pëlqej e të kënaqemi, po ndihem shumë mirë që jam në shtëpinë time, në vendin tim”, përfundoi këngëtarja me famë botërore.
