Përfaqësuestë LGBT-së kanë nisur këto ditë një fushatë ndërgjegjësimi kundër bulizmit në gjimnazet e Tiranës. Por në shkollën “Sami Frashëri”, ata kanë hasur një pengesë nga drejtoresha e kësaj shkolle, Teuta Dobi, e cila u ka mbyllur dyert me pretekstin se nuk kanë çfarë t’u tregojnë nxënësve.
Shumë njerëz janë shprehur kundër kësaj fushate që dërgon përfaqësues të aleancës në dyert e shkollës, edhe pse një gjë e tillë lejohet nga qeveria. Sipas Vendimit të Këshillit të Ministrave, përfaqësues të LGBT-së kanë të drejtë që të zhvillojnë fushatat e tyre në ambientet e shkollave.
Drejtoresha e Aleancës së LGBT, Xheni Karaj ka reaguar menjëherë duke i dërguar një letër kryeministrit Edi Rama, e cili duket se e mbështet këtë fushatë. Xheni Karaj ka bërë dhe një status në Facebook për drejtoreshën e “Sami Frashërit”, për të cilën thotë se nuk është heroinë por “një turp ndër turpet e tjera që po mbysin sistemin arsimor në Shqipëri”.
AUTOGOLAT E DREJTORESHËS SË SAMI FRASHËRIT
Drejtoresha e Samiut sot i bëri dy autogola vetes.
I pari ishte momenti kur gënjeu dhe tha qe nuk do të lejonte LGBT në shkollën e saj. Ndërkohë në datë 11 Dhjetor, ne kemi qenë në shkollën “Sami Frashëri” dhe kemi diskutuar mbi çështjet e bulizmit me 25 nxënës të mrekullueshëm dhe një psikologe të painformuar dhe homofobe, së cilës i tërhoqën vëmendjen disa herë nxënësit për injorancën që po shpaloste. Fakti që zonja drejtoreshë as e ka idenë, çfarë ndodh në shkollën e saj, na tregon se sa e interesuar është ajo për nxënësit.
Autogoli i dytë është vetë fakti që LGBT për herë të parë në shkollën e zonjës nuk hynë në momentin kur unë dhe koleget e mia shkelëm pragun e derës por që në themelim të Samiut në vitin 1963. Shumë prej tyre mund të jenë bërë dhe njerëz të artit siç e ka ëndërr drejtoresha ose politikanë (fotot e së cilëve i mban nëpër muret e shkollës) por atë s’do ta dimë kurrë pasi në ato vite nëse pranoje që ishe gay përfundoje me mbi 10 vjet burg.
Deklarata homofobike që bëri drejtoresha sot, nëse mbetet e padënuar do t’i detyrojë nxënësit që shkelin çdo ditë në atë shkollë, të mos guxojnë kurrë të jenë vetja se do vuajnë “burgun” e Znj.Dobi. I bëri nxënësit e kësaj shkolle të ndjehen të përjashtuar dhe stigmatizuar për të disatën herë në jetën e tyre.
Znj. Dobi nuk është heroinë por një turp ndër turpet e tjera që po mbysin sistemin arsimor në Shqipëri.
