Industria e turizmit ishte ndër të parat që u godit nga kriza për shkak të pademisë Covid-19.
Agjencitë turistike ndalën të parat aktivitetin e tyre pas përhapjes së rasteve me Covid-19 dhe me shumë gjasa do t’i rikthehen të fundit normalitetit.
Për shkak të Covid-19, tregu i agjencive turistike u përball me falimentime masive në rastin më të keq, si dhe largime nga puna në rastin më të mirë.
Agjencitë kanë ngelur në mëshirë të fatit, teksa përpiqen për mbijetesë në një kohë kaq të vështirë. Vëmendja është fokusuar tek vera dhe destinacionet alternative që mund të shfrytëzohen në vitin 2021.
Çfarë vendesh kthyen në trend shqiptarët?
Për shkak të kufizimeve me Europën dhe shumë vende të tjera, shqiptarët kanë kthyer këto kohë në trend pushimesh vende si Turqia, Dubai e Egjipti, ndërsa brenda vendit, interesi më i madh ishte për Korçën, Pogradecin dhe veriun e vendit.
Megjithatë, shifrat në rritje të infektimeve, mundësitë për kufizime të reja dhe zgjedhjet e prillit e bëjnë të paqartë panoramën për sektorin e turizmit në vazhdim.
Sipas Agim Mehmetit, administrator i agjencisë turistike “Albtours”, sezoni i verës në kohë normale zë 65% të volumeve të shitjeve nëpër agjenci.
Nëse do të kryhet vetëm 50% e këtij volumi për shkak të pandemisë, Mehmeti pohon se kjo do t’i shërbejë tregut të qëndrojë mbi ujë këtë vit. Sytë e të gjithëve janë tek sezoni veror.
Biznesi është pesimist në parashikime, duke u mjaftuar vetëm me shpresën se edhe në vitin 2021 do të mbijetojë, ndërkohë që pandemia Covid-19 duket si një fund pa fund.
Nëse i bëjmë një përmbledhje vitit 2020 për tregun e agjencive turistike, mund të themi se janë rreth 1300 agjenci të regjistruara në Qendrën Kombëtare të Biznesit.
Një vit më pas, një pjesë e tyre kanë mbyllur NIPT-et, një pjesë tjetër kanë lënë zyrat por nuk kanë mbyllur aktivitetin, duke u munduar t’i shërbejnë klientëve nga shtëpia. Agjencitë që kanë pak më shumë punë, kanë zgjedhur strategji mikse të ndryshme, për të përballuar situatën, si ulja e kostove. Pjesa më e madhe kanë bërë shkurtime dhe ato kanë kapur marzhin mes 30-50%, në varësi të agjencisë. Një nga humbjet më të mëdha në këtë situatë janë burimet njerëzore.
Pandemia ka shkaktuar një dramë në industrinë e turizmit dhe askush s’po e ndihmon këtë sektor të ngrejë kokë e të rimëkëmbet!
