Ish-presidenti francez Nicolas Sarkozy do të hyjë në burg sot për të vuajtur dënimin për komplot kriminal në financimin e fushatës së tij elektorale të vitit 2007 me para të ardhura nga Libia. Ai bëhet ish-udhëheqësi i parë i Francës moderne që burgoset. Sarkozy kundërshton si vendimin e gjykatës, ashtu edhe urdhrin e pazakontë të gjyqtarit për ta dërguar në burg përpara shqyrtimit të apelimit.
Rruga e tij nga pallati presidencial Élysée deri te burgu famëkeq “La Santé” në Paris, ka tërhequr vëmendjen e gjithë Francës.
Njëri prej djemve të tij, Louis Sarkozy, bëri thirrje për një tubim në mëngjesin e sotem në mbështetje të babait të tij, në lagjen luksoze pariziene ku Sarkozy jeton me bashkëshorten, Carla Bruni-Sarkozy.
Supermodelja që u bë këngëtare ka ndarë në rrjetet e saj sociale foto të fëmijëve të tyre dhe këngë në nder të Sarkozy-t që prej shpalljes së dënimit.
Presidenti aktual i Francës, Emmanuel Macron, e priti javën e kaluar Sarkozyn në pallatin presidencial Élysée.
“Gjithmonë kam qenë i qartë në deklaratat e mia publike për pavarësinë e drejtësisë në rolin tim, por ishte normale në nivel njerëzor të pranoja një nga paraardhësit e mi në këtë situatë,” tha Macron të hënën.
Sarkozy i tha gazetës Le Figaro se pret të mbahet në izolim, për arsye sigurie, larg të burgosurve të tjerë. Një mundësi tjetër është që ai të vendoset në seksionin e të burgosurve “të ndjeshëm”, që njihet ndryshe si “sektori VIP”.
“Nuk kam frikë nga burgu. Do ta mbaj kokën lart, edhe para dyerve të La Santé,” tha Sarkozy për gazetën La Tribune Dimanche. “Do të luftoj deri në fund.”
Gazeta La Tribune Dimanche raportoi se Sarkozy e ka gati çantën e burgut me rroba dhe 10 fotografitë familjare që i lejohet të marrë me vete. Ai gjithashtu tha për Le Figaro se do të marrë me vete tre libra, numrin maksimal të lejuar, përfshirë romanin “Konti i Monte Kristos” të Alexandre Dumas, heroi i të cilit arratiset nga një burg ishullor për të kërkuar hakmarrje.
Gjykatësi parizien vendosi që Sarkozy të fillojë menjëherë vuajtjen e dënimit, pa pritur shqyrtimin e apelimit, për shkak të “rëndësisë së prishjes së rendit publik të shkaktuar nga vepra penale.”
