Reperi Don Xhoni, emri i vërtetë i të cilit është Xhonatan Isufi, është ndaluar mbrëmjen e djeshme nga Policia e Kosovës. Raportohet se reperit i është gjetur një armë pa leje, tip pistoletë dhe se ai është ndaluar në autostradë nga Policia.
Indeksonline, shkruan se arma iu gjet Don Xhonit në automjetin e tij të tipit BMW.
Kjo nuk është hera e parë që Don Xhoni ka probleme me Policinë e Kosovës. Vetëm gjatë këtij viti ai disa herë është ndaluar nga për armëmbajtje pa leje.
Rasti më i fundi është ai i qershorit, ku reperit iu sekuestrua nga Policia një armë dhe gjashtë fishekë.
Don Xhoni bëri reagimin e tij pas ndalimit nga policia e Kosovës. Nga një live në Instagram, reperi tha:
“Gjithçka është në rregull, nën kontroll, gjithçka është stabile, respekte për Policinë e Kosovës dhe sjelljen e tyre”.
Agron Borovci, zëdhënësi i Policisë për rajonin e Prishtinës, tha në atë kohë se reperit i janë gjetur dhe sekuestruar një armë dhe gjashtë fishekë.
“Sot rreth orës 15:15, në rrugën “Tahir Zajmi” në Prishtinë, pas një kontrolli të detajuar të ushtruar ndaj një personi, policia ka arritur të gjejë dhe sekuestrojë një revole të tipit Zastava, kalibër 7.65 mm, si dhe gjashtë copë fishekë, kalibër 7.65 mm”, tha ai. 22-vjeçari u shoqërua më pas në stacionin policor.
“I dyshuari Xh. I, mashkull, 22 vjeç, shtetas i Republikës së Kosovës, është shoqëruar në stacionin policor, për t’u proceduar më tej, konform rekomandimeve të prokurorit të shtetit”, tha Borovci.
