Don Phenom është një ndër reperët më të suksesshëm shqiptarë dhe ashtu si shumë artistë të tjerë mbrëmjen e sotme do të performojë në Colour Day Festival.
Një nga gazetaret e “iconstyle.al” ndodhet në terren, saktësisht në vendin ku po mbahet festivali në fjalë pra në sheshin “Nënë Tereza”, aty ku ka intervistuar ndër të tjerë edhe Don Phenom.
Ky i fundit ka folur ekskluzivisht për herë të parë për marrëdhënien që ka me vajzën që i ka vjedhur zemrën dhe mund të themi me bindje se dukej kokë e këmbë i dashuruar.
Këngëtari deklaroi se është në një lidhje me një femër shqiptare dhe pohoi se kanë shumë muaj që janë bashkë.
“Marrëdhënia deri më tani është e mrekullueshme. Ishalla vazhdon kështu. Po përpiqem që të jetë një marrëdhënie serioze”, tha Don Phenom.
I pyetur nëse ndihet e dashura komode me profesionin e tij, këngëtari theksoi: “Po, po, patjetër, realisht duhet me e respektu profesionin se me këtë punë merremi!”
Rikujtojmë se reperi së shpejti pritet që të sjellë një bashkëpunim me këngëtaren e njohur Ronela Hajati.
Lidhur me këngën e re ai është shprehur: “Muzika do jetë fiks për kohën, për sezonin. Do jetë diçka ritmike, do jetë një këngë shumë e bukur. Është një nga këngët më të preferuarat të miat që kam bërë deri më sot.”
Por çfarë i bashkoi dy këngëtarët më në zë të momentit?
“Jemi lidhur në një koncert. Kemi pasur një koncert të përbashkët dhe kanë folur menaxherët me njëri-tjetrin dhe iu ka pëlqyer ideja. Ronela është një gocë e talentuar, është një supertalent si në studio edhe në skenë”, tha Phenom.
Ndërkohë ne të gjithë jemi në pritje të hitit të ri të verës…
