Mbrëmjen e djeshme emisioni investigativ “Fiks Fare” denoncoi rastin e prodhimit të domateve dhe shalqinjve me hormone dhe stimulantë, jashtë normave të lejuara (lexo këtu).
Fermerët shqiptarë përdornin stimulantë dhe hormone për pjekjen para kohe të fruta-perimeve në zonën e Muzeqesë dhe vetë nuk i konsumonin këto produkte.
Ministria e Bujqësisë ka reaguar sot duke thënë se produktet shqiptare janë të certifikuara nga vendet e Bashkimit Europian ku eksportohen.
Dhimo Kote, zëvendësministër i Bujqësisë thotë se frutat dhe perimet e prodhuara në Shqipëri nuk dalin përpara sezonit të rajonit dhe se i njëjti produkt është i destinuar edhe në Shqipëri.
Megjithatë nuk janë përjashtuar rastet e përdorimit e tepruar të stimulantëve dhe hormoneve edhe pse citohet se nuk jemi në gjendje alarmi.
Nuk e kuptojmë se çfarë kanë parasysh me togfjalëshin “gjendje alarmi”, por fakti që një shalqi prodhohet për 10 orë me hormone, sigurisht që është shqetësues.
