Mbrëmjen e kaluar një 31-vjeçar ishte rasti i gjashtë i konfirmuar në Shqipëri si i prekur nga Koronavirusi.
Ai ishte infektuar në Milano teksa kishte shkuar për një udhëtim 1 ditor për të vizituar dajën e sëmurë.
Ditën e sotme, ai ka dhënë deklaratën e parë për mediat dhe për “Ora News” dhe nëpërmjet një lidhjeje telefonike, tha se e mori vesh që kishte dalë pozitiv vetëm nga lajmet. Askush nuk ia kishte thënë më parë.
Ai thotë se gjendja shëndetësore është e mirë, por ka merak vetëm për familjarët dhe të afërmit që ka takuar.
Ka dalë ministria e Shëndetësisë në publikim zyrtar e thotë që unë jam i prekur nga koronavirus por mua askush nuk më ka thënë se jam i prekur nga koronavirus. Kam mbi 36 orë i izoluar. Ka ardhur dje një doktor më ka marrë analizat dje dhe nuk ka ardhur askush tjetër, vetëm infermierët. Edhe infermierët janë të cuditur e nuk e dinë si ka mundësi që jam i infektuar.
“S’kam asnjë përgjigje. Unë jam top, por më ka kapur paniku. Jam trembur për familjarët e mi nuk po i bëjnë tamponët. Kam takuar shumë miq dhe shokë, kam frikë për ta“, shprehet i riu.
Ai tregon se kishte udhëtuar në të njëjtin avion me gruan nga Lushnja e cila pak ditë më parë ishte paraqitur në Infektiv dhe menjëherë më pas kishte shkuar vetë me këmbët e tij dhe kishte insistuar per te bere tamponin.
