Pas 40 ditësh i shtruar në spital shkrimtari dhe gazetari, Mark Simoni, ka fituar betejën me Covid-19. Përmes një postimi në rrjete sociale ai ka rrëfyer të gjithë këtë eksperiencë, që e ka krahasuar me një tunel të errët, në të cilin ka kaluar ditët më të vështira të jetës së tij.
Simoni thotë se ai ishte shumë pranë të bërit banor i një realiteti tjetër dhe se fatmirësisht ja doli të shpëtonte nga skenari më fatal. Më herët ai ka shprehur mirënjohjen për mjekët e spitalit “Shefqet Ndroqi” që janë kujdesur për të. Gjatë kohës që qëndronte shtruar në spital, shkrimtari dhe gazetari i njohur, u shpreh se është i pakujdesshëm si pjesa më e madhe e shqiptarëve dhe se mund të ishte infektuar në ndonjë udhëtim.
Statusi i shkrimtarit
PA ETIKË? ….
U ktheva. Një kthim i vështirë, duke dalë nga tuneli i errët i sëmundjes, vetëm një çast larg, ku unë isha fare pranë të bërit banor i një realiteti tjetër. Kanë qenë ditët më të vështira të jetës sime.
Sa herë më është kujtuar një poezi, mos gaboj e Din Mehmetit TË VEGJËL SPITALET / Dhomat janë shumë të vogla, koridoret krejt të ngushtë, për t’i shpëtuar VDEKJES.
Ndoshta kjo fjalë e rëndë duhet të mos përdoret për arsye etike. Por edhe më etike se vetë etika është e vërteta. COVID është një Inteligjent i Zi, një rrezik kaq i madh e potencial, sa vetëm ajo fjalë paraqet rrezikun e tij të vërtetë.
Ndaj dhe ne si Shtëpi Botuese MUZGU, në alarm dhe respekt të mbrojtjes nga kjo flamë, kemi dhuruar rreth 200 maska të personalizuara, si një gjest për t’i rënë këmbanave të rrezikut.
Të vetmit në atë terrin tim prej 40 ditësh në spital, që më jepnin dritë dhe iluminim ishin qindra e qindra mesazhet tuaja që më vinin si bekim. Përulem dhe bie në gjunjë, para mesazheve, përshëndetjeve dhe urimeve tuaja, që më dhanë aq shumë frymë sa vetëm vetja ime e di dhe e ndjen
https://www.facebook.com/photo.php?fbid=2805823526313421&set=a.1729530270609424&type=3&theater
