Kryetarja e LSI-së, Monika Kryemadhi po na befason nga dita në ditë me pamjen e saj të freskët. Fillimisht ishte bashkëshorti i saj, Presidenti Meta që falë një trajtimi mjekësor arriti të humbiste shumë kilogramë dhe pas tij ndodhi edhe ndryshimi në pamjen zonjës Kryemadhi. Një fizik për tu pasur zili dhe një stil veshjeje i ri ndryshuan imazhin e zonjës Monika.
Doktoresha Silva Shametaj Ruli ka zbuluar se në këtë ndryshim nuk ka asnjë gjë të mistershme dhe iu jep fund gjithë hipotezave rreth ndryshimit të Monikës. Ajo është mjekja personale e Monikës dhe në një intervistë për “NewsBoomb” ka treguar se ajo ka ndryshuar pamjen e kryetares së LSI-së dhe jo vetëm. Dr.Silva kujdeset për të gjithë familjen presidenciale edhe pse jeton e punon në Itali.
“Kuroj familjen e Presidentit e shumë pacientë të tjerë përmes vështrimit global 360 gradë, përmes monitorimit të gjendjes shëndetësore, parametrave klinikë, nutriconale dhe specifike laboratorike. Është ky kyçi i një jete të shëndetshme. Korrigjimi i defiçiteve në parametra, dieta e balancuar e raporteve të proteinave, karbohidrateve e fibrave si dhe integrimi i oligoelementeve dhe integrimi makrobiotik është një element fondamental. Gjithashtu dhe integrimi i substancave antioksidante në raporte të kontrolluara mjekësore si kurkuma, vitamina E, C, selenium, si me rrugë ushqimore ashtu edhe me infuzione endovenoze të cilat reduktojnë stresin organik dhe ndikojnë në jetëgjatësinë e rigjenerimin qelizor. Dieta e kontrolluar, kontrolli i aktivitetit fizik dhe monitorimi frekuent klinik jep rezultatet që janë mëse të dukshme”, ka thënë doktoreshë Silva.
Të gjithë jemi kureshtarë për dieta specifike e regjime të përcaktuara që mund të shërbejnë si shembull edhe për persona të tjerë, por doktoreshë Silva nuk jep formula magjike. Ndryshimi i dukshëm i Monika Kryemadhit, sipas doktoreshës, ka ardhur vetëm falë një programi të personalizuar.
“Nuk ka asnjë formulë ideale në mjekësinë serioze. Ka pacientë me parametra e karakteristika individuale që kërkojnë trajtime individuale. Dietë normokalorike, e balancuar dhe e integruar. Një nga elementët kryesorë, jo vetëm me zonjën Kryemadhi është raporti i besimit mes mjekut dhe pacientit. Besimi dhe bashkëpunimi”, ka thënë Dr.Silva.
Konkretisht për Monika Kryemadhin, doktoresha ka treguar se për vetë pozicionin social, që jeton një jetë me probleme,ajo është jo indiferente ndaj stresit psikologjik dhe fizik. Kjo sjell shpesh një tendencë të një jete jo të shëndetshme. Në fakt vlen, sipas doktoreshës, për të gjithë pacientët që ndjek në Shqipëri.
Doktoreshë Silva duke qenë se punon e jeton në Itali vjen në Tiranë çdo tri javë, pasi ndjek shumë pacientë. Ndër ta dhe një politikane tjetër të njohur, Majlinda Bregun.
Kushti i vetëm për të qenë të suksesshëm në këtë trajtim sipas Dr. Silvës është vetëm që pacientët duhet të jenë besnikë dhe të rregullt, atëherë nuk ka më vend për vështirësi në trajtim edhe kur bëhet fjalë për personalitete të politikës.
“Vështirësia kur kanë besim nuk ekziston më. I vetmi ndryshim është që secila ka karakteristikat fizike, karakteriale e mjekësore të ndryshme. Dhe impenjimi im është i ndryshëm në varësi të asaj që dua të arrij, të kuroj apo përmirësoj”, i është përgjigjur doktoresha interesimit për profilin e dy politikaneve.
Në profesionin e saj nuk lejohet të zbulohen sekrete.
“Janë të kontrolluara e monitoruara siç mendoj që duhet të jenë individët mbi 40 vjeç. Të parandalosh është më mirë se sa të kurosh. Por është koncept i vështirë në Shqipëri, ky”, është e vetmja gjë që ajo zbulon.
Ndërkohë, doktoreshë Silva, edhe pse ka jetuar e studiuar në Itali, ka treguar që nuk ka qenë e vështirë të krijojë kontaktet me emrat e politikës shqiptare. Ajo është vajzë Tirane, bijë mjekësh, i ati ka qenë docent universitar, është i të njëjtit brez dhe mikeshë familjeje me Kryeministrin Rama, ish-studente e doktorit dhe komshije me Monikën e Majlindën.
