Një histori me një truprojë tepër tërheqës, me siguri të kujton filmin e famshëm “Bodyguard” me Whitney Houston dhe Kevin Costner, por kjo që do t’ju tregojmë sot ka shumë më tepër emocione se klasiku i vitit 1992.
“The Bodyguard” është seriali triller politik, i vitit 2018, prodhuar nga BBC, që mban emrin e Jed Mercurio (krijuesi i “Line of Duty”) dhe interpretimin e shkëlqyer të Keeley Hawes dhe Richard Madden (i njohur si Robb Stark nga “Game of Thrones”).
Seriali, i cili është cilësuar si një nga më të ndjekurit në Britani nga viti 2006, ka gjithsej 6 pjesë, dhe të detyron t’i shohësh të gjashta përnjëherë!
Ai tregon historinë e një ish-ushtaraku, (David Budd) të zhgënjyer thellësisht nga përvoja e tij në Afganistan dhe thellësisht i mërzitur nga politikanët që shfaqin një entuziazëm të pazakontë për ndërhyrjet ushtarake jashtë vendit.
David e gjen veten duke pranuar një post mjaft të rëndësishëm dhe me rrezik të lartë, pasi i duhet të jetë truproja i Sekretares së Shtetit, Julia Montague, ambicia politike dhe vendosmëria e së cilës, po zgjeron me shpejtësi listën e saj të armiqve.
Të gjithë i duan femrat e forta!
Julia është një femër e fortë dhe ambicioze. Ndonëse David është mashkulli që e mbron, në thelb është ajo që manipulon. Julia bëhet shkak që marrëdhënia me truprojën të kalojë kufinjë e profesionalitetit mes tyre dhe këtë e bën në mënyrë tepër klasike kur shprehet:
“Të lejohet të më prekësh, nuk jam Mbretëresha!”
Dhe nëse ti që po lexon këtë je feminist/e atëherë do të të pëlqejë kur të shohësh sesi truproja trajtohet edhe si objekt seksi. Atij i duhet të dalë fshehurazi nga dhoma e Sekretares, pasi të dy kanë “inspektuar” çarçafët në dhomën e gjumit!
Dhe jo vetëm kaq! Që në momentin kur fillon episodi i parë, ne shohim femra në pushtet: politikane femra, femra në pozicione të larta, femra terroriste etj. Ka modele të shkëlqyera të femrave të këtë serial dhe ne femrat ndihemi shumë mirë kur e shohim!
Kujt t’i besosh?
Ajo që e bën serialin tërheqës është fakti që absolutisht asnjë nuk është i besueshëm kur është fjala për të mbrojtur Julia-n. As vetë David! Ai është i rrënuar nga stresi i luftës që i ka lënë trauma të vërteta, që shpesh e detyrojnë të kryejë akte të dhunshme në gjumë. David nuk buzëqesh kurrë, (dhe sërish duket shumë i mirë) urren atë për të cilën Julia po lufton kaq shumë dhe nga ana tjetër është engjëlli i saj mbrojtës!
Askush nuk është i sigurt!
Kush qëndron mbas atentateve, komploteve! Të gjithë dyshojnë për të gjithë. Por është Julia ajo që rrezikon jetën mbi të gjitha dhe njerëzit rreth saj janë të dyshimtë! Por a është vetë David në mesin e tyre? Dhe për sa kohë mund të vazhdojnë ata dy të punojnë në kushte të tilla pa u takuar fshehurazi dhe rrëshqitur në çarçafët e dhomës së hotelit?
