Konsulli i nderit të Ukrainës në Shqipëri, Bledar Bajraktari, ka lajmëruar ditën e sotme se në vendin tonë pritet të vijë autobusi i parë me 40 gra dhe fëmijë nga Ukraina.
Ata do të strehohen nga familjet shqiptare të cilat kanë hapur dyert për t’iu gjendur pranë shtetasve ukrainas.
Nuk do të jenë vetëm 40 familje që do të vijnë në Shqipëri, pasi edhe familje të tjera të cilat nuk kanë mundësi të largohen nga Ukraina në mënyre individuale kanë kërkuar të vijnë të strehohen .
Numri i kërkesave për të ardhur është në rritje në çdo moment, por ku do të strehohen shtetasit ukrainas?
“500 i merr përsipër shteti shqiptar, ndërkohë që janë vetofruar familjarë nga Shkodra në Sarandë”, thotë Bajraktari.
Bajraktari theksoi se i vetmi problem është kush mund të drejtoje autobusin, pasi meshkujt nuk mund të dalin nga Ukraina.
“Janë disa grupe gati por sa të gjendet formula, mund të drejtojë autobusin një grua e të niset”, thotë Bajraktari.
Qeveria shqiptare ka ndërmarrë këtë të premte një vendim sipas të cilit të gjithë shtetasit ukrainas mund të hyjnë dhe të qëndrojnë pa leje qëndrimi në Shqipëri.
Në Shqipëri ekziston një frymë solidariteti për refugjatët ukrainas, që janë kryesisht të moshuar, fëmijë dhe gra që i largohen bombardimeve ruse, ndërsa luftën me rusët po e përballojnë burrat nga 16 deri në 65 vjeç.
Por Shqipëria ende nuk ka një plan se sa refugjatë mund të përballojë, se sa do të jetë kostoja e pritjes të tyre dhe ku do të strehohen ata. Deri më tani është rënë dakort parimisht, që refugjatëve ukrainas t’u krijohen kushtet e nevojshme për strehim, por kapacitetet e strehimit janë të pakta.
