Është publikuar sot fotoja e 25-vjeçares që humbi jetën dje në kanionet e Holtës, pasi e mori rrjedha e ujit.
Desantila Sollaku kishte shkuar për turizëm me vëllain e saj dhe disa të afërm. Së bashku me 32 persona të tjerë nga Puka, Desantila u nda në dy grupe, njëri prej të cilëve humbi kontaktet me tjetrin.
Në momentin e vërshimit të ujit ajo bashkë me vëllanë të cilët ishin në fundin e luginës u rrëmbyen nga rrjedha e lumit. Vëllai së bashku me familjarin 50-vjeçar arritën të shpëtonin duke u mbajtur në anët e gurëve të faqeve të kanionit.
Ndërsa trupi i 25-vjeçares u gjend rreth 1 km poshtë hyrjes së kanionit nga polumbarët e Elbasanit. 25-vjeçarja nga Lushnja kishte përfunduar studimet për infermieri në Tiranë dhe së shpejti do të largohej drejt Gjermanisë, ku do të ushtronte profesionin e saj.
Ajo jetonte në Savër të Lushnjës, ndërsa familja kishte vendosur të kalonte fundjavën në Holtë meqë vëllai, Denisi sapo ishte kthyer nga Gjermania.
Por pushimet e tyre u kthyen në tragjedi për 25-vjeçaren dhe familjen e saj!
