Një nga temat më të nxehta të momentit është ajo për fatin e Teatrit Kombëtar: Do të prishet për të ndërtuar një të ri apo jo?
Pas takimit të fundit mes aktorëve dhe kryebashkiakut Erion Veliaj dhe reagimit ditën e djeshme të shoqërisë civile, aktori i madh i skenës, Robert Ndrenika, vendosi t’i dërgonte një letër Presidentit të Shqipërisë, Ilir Meta.
Nisur nga ajo çfarë ndodhi dje në Komisionin e Medias, ku u përplasën Albana Vokshi dhe kryebashkiaku Erion Veliaj, Ndrenika shkruan se partitë politike nuk duhet të trazohen në punët e teatrit, që janë kthyer në një temë të nxehtë dhe të mbushur me debate.
Në letrën e siguruar nga “GSH”, Ndrenika i drejtohet kreut të shtetit kështu:
“I nderuar President i Republikës Ilir Meta!
Duke parë në TV atë që ndodhi dje në Komisionin e Medias mu forcua bindja, se partitë politike, nuk duhet të trazohen në punët e teatrit.
Kam mendimin se kjo çështje, zgjidhet me bisedime midis komunitetit teatror dhe specialistëve. Deputetët dhe politikanët në këtë rast, janë qytetarë dhe më së shumti, spektatorë. Ndërsa qeveria “pa zhurmë dhe pa fjalë”, është e detyruar të fusë duart në qese dhe të nxjerrë paratë!!!
Me plot respekt
Robert Ndrenika”.
Në një nga protestat e organizuara në prill para teatrit, Ndrenika i kërkoi Presidentit që të reagonte: “Në këtë pikë duam edhe mendimin e Presidentit të Republikës për këtë çështje”.
