Lëvizja e akrepave të orës 60 minuta përpara gjatë verës dhe kthimin e tyre mbrapsht gjatë dimrit duket se është kthyer në shqetësim për pjesën më të madhe të qytetarëve europianë.
Në një sondazh online, ku morën pjesë 4.6 milionë e qytetarëve të BE-së, shumica janë shprehur për mos ndërrimin e orës në kohën e dimrit dhe atë të verës.
Nisur nga ky rezultat presidenti i Komisionit Europian, Jean-Claude Juncker në një intervistë për programin e mëngjesit në televizionin “ZDF” është shprehur se pasi shumica e qytetarëve i kanë thënë jo ndërrimit të orës, Komisioni Europian do të propozojë heqjen e këtij rregulli.
“Njerëzit duan që ne ta bëjmë këtë. Që këtë të premte Komisioni do të marrë vendimin përkatës. Pastaj e kanë radhën shtetet anëtare dhe Parlamenti Europian, e në fund nuk do të kemi më ndërrimin e orës në kohën e dimrit dhe të verës”, tha Juncker.
Ndërrimi i orës aktualisht bëhet dy herë në vit në 28 vende anëtare të BE-së. Ky veprim është bërë me synim që të shfrytëzohet sa më mirë drita, për të kursyer energji, megjithëse vlera e vërtetë e kursimit gjithmonë ka qenë e kontestuar.
Burimi: Balkanweb
