“Balena Blu” (Blue Whale Challenge) quhet loja e frikshme e përhapur së fundmi në rrjete sociale, që u ka marrë jetën mbi 157 të rinjve në Rusi, po përhapet në Britaninë e Madhe, në Itali dhe së fundmi, policia raporton raste edhe shumë pranë nesh, në Greqi.
Loja e tmerrshme konsiston në realizimin e disa sfidave brenda 50 ditësh.
Një 14-vjeçar shqiptar që banon në Kilkiz në veri të Greqisë, si edhe një 14-vjeçare greke në Katerinë janë dy rastet e para të afërta që njihen të kenë rënë në kontakt me “kuratorët” e kësaj loje, që po tmerron prindërit në të gjithë botën.
Djali tregoi për policinë se gjithçka nisi në “Facebook”. Ashtu siç veprojnë gjithmonë, për të kontaktuar me të i dërguan një mesazh në “Facebook”, duke i propozuar të luajë një lojë.
“Më shkroi: “Do që të luajmë një lojë? Jam Balena Blu.”
Kështu i ishte prezantuar 14-vjeçarit, për ta bërë kureshtar se ç’është Balena Blu, që më pas t’i propozonte edhe atij të bëhej një Balenë Blu përmes një sfide 50-ditëshe që përfundon tragjikisht me vetëvrasje.
“Top Channel” shkruan se për fat të mirë, 14-vjeçari kishte kërkuar të dinte akoma më shumë detaje mbi lojën, pasi personi i panjohur i kërkoi diçka shumë të çuditshme.
“Po, dua të luaj, çfarë loje?”, i kishte shkruar djali, dhe i panjohuri i ishte përgjigjur: “Gjuaj me shpulla veten tënde dhe më dërgo një video.”
Por pasi djali i kërkoi hollësi, i panjohuri e bllokoi menjëherë duke fshirë edhe mesazhet në “inbox”. 14-vjeçari lajmëroi prindërit të cilët iu drejtuan menjëherë policisë së krimit kibernetikë.
Kjo “lojë” e sëmurë që nuk dihet kush e ka krijuar dhe kush vazhdon t’i vrasë këta fëmijë, po kthehet në fatalitet. Gjatë sfidës 50 ditore, fëmijët vihen në kontakt me të ashtuquajturit “kuratorë”, të cilët anonimisht i shtyjnë të lëndojnë veten çdo ditë, derisa në ditën e 50-të u thonë të hidhen nga një ndërtesë shumë e lartë. “Sa më e lartë, aq më mirë”, thuhet në rregullat e lojës.
Çdo ditë ka një sfidë të re të tmerrshme: të presin veten, të gdhendin balenën blu me brisk në lëkurë, të zgjohen në orën 4:20 të mëngjesit dhe të shikojnë videot e horrorit, që u dërgon “kuratori”, të qëndrojnë me ditë pa folur me askënd, duke i çuar në gjendje depresioni të thellë, aq sa urdhri i fundit: “Hidhu nga një ndërtesë e lartë”, t’u duket i vetmi shpëtim.
Nuk dihet ç’mendje perverse gjendet pas kësaj loje që bën pre fëmijë të moshave më të brishta, 9-17 vjeç. E sigurt është se e gjithë kjo është e mirëmenduar, duke studiuar me detaje psikologjinë njerëzore, në mënyrë që t’i bëjnë fëmijët të hyjnë pa e kuptuar në një rreth vicioz nga i cili nuk dalin dot më.
Të zgjohesh në orën 4:20 të mëngjesit për të parë video të njerëzve që vrasin veten në të gjitha mënyrat, si edhe të dëgjosh muzikë depresive çdo ditë, pa folur me askënd, do të çonte drejt depresionit këdo, aq më tepër fëmijët.
Prokurori federal i Belgjikës, Frederic Van Leeuw, u ka bërë apel përmes “Top Channel” të gjithë prindërve të raportojnë nëse vënë re ndonjë ndryshim në sjelljet e fëmijëve të tyre.
“Bota dixhitale nuk njeh kufij. Nuk e di si është situata në Shqipëri, por do të jetë shumë e dobishme të verifikojmë nëse ekziston edhe këtu ai lloj problemi. Nuk do të çuditesha nëse do ta zbulonit edhe këtu, sepse është një problem i fshehur dhe duhet marrë seriozisht nga efektivët e policisë. Mund të ketë prindër të gatshëm të raportojnë se fëmijët e tyre po bëjnë diçka të çuditshme sepse sfidat duken si të pafajshme. Duhet të hyjmë gjithashtu brenda bisedave të tyre për të parë kush është i përfshirë në këtë problem. Ndaj kjo është edhe një thirrje për prindërit”, deklaron Van Leeuw.
