Greqia do të heqë bërjen e tamponit për shumicën e qytetarëve që duan të kalojnë kufirin!
Zv. ministri i jashtëm, Agron Tare tha për Report tv se testi do t’u bëhet atyre personave të cilët kanë shenja se janë infektuar me koronavirus.
Ai u shpreh se nëse vihet re një rritje e numrit të infektimeve në vend, Greqia mund edhe të mbylë kufijtë.
“Në këto momente është hapur kufiri dhe po kalojnë qytetarët se ishte bllokuar. Kjo situatë është në të gjithë botën, janë kushte të sigurisë, jo se grekët kanë bllokuar. Ministria e Brendshme greke është në debat me ministrinë e Brendshme për të hequr tamponin. Deri tani ka qenë e bllokuar, se mjekët nuk kanë pasur tamponë. Tani do hapet, po diskutohet që të hiqet testi, disa do kalojnë pa tamponë, disa të tjerë që ka dyshime do u bëhet. Që t’ua bëj më të thjeshtë, nëse kalojmë 100 makina, 10 qytetarë mund t’u bëhet tampon, të tjerëve jo. Kjo situatë do jetë nga sot, pastaj në varësi të shifrave do shihet, se mund të mbyllet fare kufiri nëse ka raste të reja shumë”, tha Tare.
Më herët, Ministria e Brendshme u bëri thirrje qytetareve që të informohen për gjendjen në Pikat e Kalimit Kufitar me Greqinë përpara se të ndërmarrin udhëtim drejt tyre, me qëllim që të shmangen sa të jetë e mundur pritjet e gjata në kushtet e temperaturave të larta.
E ndërkohë që një nga arsyet e dyndjes së qytetarëve drejt Greqisë mund të jetë testimi falas në kufi, Ministria e Punëve të Jashtme u kujtoi shqiptarëve pak më herët se për të shmangur radhët, për testet mund t’iu drejtohen privatëve në vend, ku është lincenuar testimi për COVID-19.
