“Shqipëria nuk do të ndërtojë kurrë kampe për refugjatët”.
Ky është qëndrimi i kryeministrit Edi Rama, në një deklaratë për median gjermane “Bild”. Ndërsa javët e fundit kishin nisur debatet nëse duhet të pranohen apo jo refugjatët në Shqipëri, kreu i qeverisë hedh poshtë të gjitha dyshimet për ngritjen e kampeve.
Kjo përgjigje vjen një ditë pasi Këshilli Evropian vendoi për çeljen e negociatave vitin e ardhshëm. Rama shprehet se, “njerëzit e dëshpëruar nuk mund të trajtohen si mbetje toksike që nuk i do askush”.
Shqipëria do të jetë gjithmonë e gatshme të japë një kontribut në përgjegjësinë që ka Evropa, bazuar te mundësitë e vendit, theksoi Rama për “Bild”.
“Por kjo nuk do të thotë se vendi ynë do të marrë përsipër problemet e të gjithëve”, është shprehur kryeministri.
Rama gjithashtu deklaroi në intervistën për prestigjiozen gjermane se, “kriza e refugjatëve nuk ka asnjë lidhje me integrimin në Bashkimin Evropian”.
Ai ka theksuar se nuk do të pranoheshin qendrat e refugjatëve edhe nëse në këmbim do të ofrohej drita jeshile me BE-në.
Burimi: Bild
