Guvernatori i Toscana-s Enrico Rossi është shprehur i shqetësuar për shpërthimet e fundit të virusit në qytetin italian, që sipas tij, e kanë burimin nga jashtë.
Nga 16 raste të reja me Covid-19 të regjistruara sot në buletinin e përditshëm të Toscana-s, 13 persona kanë ardhur nga Shqipëria, në veçanti nga Tirana, dhe një rast tjetër është një qytetar i Ekuadorit.
Në njoftimin e fundit Rossi kërkon të dijë të dhënat jo vetëm se kush ka zbarkuar ose do të zbarkojë në Firence dhe Pisa, por edhe në aeroportet e tjera italiane dhe prej andej të transferohet në Toscana.
Në fakt, të gjithë pasagjerët plotësojnë një pyetësor ku vendosin vendbanimin e tyre në Itali.
Ai u bën thirrje qeverive përkatëse që të gjurmojnë, testojnë dhe hetojnë rastet me kujdes.
“Përndryshe, nëse gjurmimi i pasagjerëve dhe mbikëqyrja aktive e tyre nuk është e mundur, do të ketë vetëm një mundësi: bllokoni fluturimet direkte”.
Rossi ka kontaktuar me konsujt e Shqipërisë, Bangladeshit dhe Perusë, vendet nga të cilat erdhën shumica e njerëzve që rezultuan të infektuar në Toscana nga 13 korriku. Ai kërkoi nga diplomacitë ndihmë për të përcjellë te bashkatdhetarët e tyre informacionin mbi detyrimin 14 ditor për karantinë për shtetasit që vijnë nga jashtë Bashkimit Evropian, ose më saktë nga vendet jo-Shengen.
Por ka një problem! Ata që vijnë nga Shqipëria si nga çdo vend tjetër jo-Shengen mund të zbarkojnë në aeroporte të tjera në Itali dhe më pas të lëvizin në mënyrë të pavarur në Toscana.
“Prandaj është e nevojshme që Qeveria të lëvizë – thotë Rossi – që gjurmimi të jetë i plotë: linjat ajrore kanë të dhëna për vendbanimin, të përkohshëm ose të përhershëm, për ata që ulen në tokën italiane”.
/Iconstyle.al
