Prej muajsh banorët e Divjakës janë njoftuar për ndërtimin e një resorti gjigant turistik në pronësi të Behgjet Pacollit.
Resorti prej 3300 metra katrorë do të ndërtohet nga kompania “Mabetex”, e cila tashmë e ka bërë publik projektin në kufi me Parkun Divjakë-Karavasta.
Në faqen zyrtare të kompanisë thuhet se resorti do të prekë 1050 hektarë në pyll si dhe 200 hektarë në det. Kompania e sheh këtë projekt si “një mundësi të jashtëzakonshme ekonomike dhe sociale për banorët e zonës dhe për rizhvillimin e mjedisit, duke ofruar siguri për kafshët e egra të parkut”.
Nuk dihet ende nëse ky resort ka marrë miratimin e qeverisë por shoqatat ambientaliste tashmë e kanë shtruar problemin se projekti cenon parkun e gjelbër në Parkun e Karavastasë i cili është i mbrojtur me ligj. Deri më tani, përvec publikimeve në faqen online nga vetë kompnia asgjë tjetër nuk është bërë e njohur në publik për projektin në fjalë, edhe pse “Mabetex” thotë se projekti për resortin është në punim e sipër. Por për çfarë duhet të shqetësohemi në të vërtetë nëse ky projekt nis të zbatohet:
Së pari duhet të dini që kemi të bëjmë me një zonë të mbrojtur, Parku Kombëtar i Karavastasë, që është një zonë natyrore me 24 specie në rrezik zhdukjeje, mes të cilave edhe pelikani kaçurrel.
Së dyti, sipas dokumenteve të Mabetex, projekti përfshin ndërtimin e 2350 apartamenteve, 370 vilave dhe hotele me 4,300 shtretër.
Këtu duhet të kemi parasysh ndotjen që pritet të krijohet kur në Divjakë të banojnë, sipas vlerësimeve të projektit, 18 mijë turistë. Çfarë do të ndodhë me ujërat e zeza? Ku do të derdhen?
Shqetësimi i tretë lidhet me aksesin në plazh pas ndërtimit të projektit. Në një dëgjesë publike që u bë në fillim të vitit me banorë të zonës dhe projektuesit e resortit, banorët ngritën shqetësimin:
“Ne jemi popull i varfër,” tha njëri, “dhe shkojmë në plazh me bukë me vete. A do të ketë sërish plazh publik dhe a do të administrohet nga bashkia?”
Sipas Birn, Mabetex tha se aksesi në plazh do të jetë i hapur, por nuk foli për administrim nga bashkia. Për të gjitha këto shqetësime duhet një vlerësim i plotë mjedisor, që të parashikojë jo vetëm pasojat ndaj mjedisit por edhe ndaj jetesës së komunitetit atje. Resorti parashikon një betonizim të një mjedisi që sipas aktivistëve mjedisorë kanos parkun kombëtar të Karavastasë.
Burimi: Icontyle.al
