Tesla do të pushojë nga puna më shumë se 10% të fuqisë punëtore në mbarë botën, ose rreth 14,000 njerëz. Prodhuesi i makinave elektrike e mori vendimin për shkak të ngadalësimit të kërkesës dhe presionit mbi çmimet, raporton Guardian. Tesla punëson 140,473 njerëz, sipas shifrave të fundit vjetore që ka publikuar.
Elon Musk, shefi ekzekutiv i kompanisë, e bëri të ditur vendimin përmes një mesazhi. Siç shkroi ai, Tesla ishte rritur me shpejtësi vitet e fundit dhe si rezultat kishte mbivendosje të roleve dhe funksioneve të punës në disa fusha.
Për shkurtimet e vendeve të punës ai shkroi se “nuk ka asgjë që urrej më shumë, por duhet bërë”.
‘Vendimi do të lejojë kompaninë të jetë fleksibël dhe inovative, e gatshme për ciklin e ardhshëm të fazës së zhvillimit’ shkruan Musk.
2024 nisi një fillim të vështirë për prodhuesin e automjeteve, i cili dorëzoi rreth 387,000 automjete, 13% më pak se pritjet e tregut. Kjo ishte rënia e parë e dërgesave në gati katër vjet. Në të njëjtën kohë, Tesla regjistroi një marzh fitimi bruto prej 17.6% në tremujorin e katërt, më i ulëti në vite.
Kapitalizimi i kompanisë është rreth 525 miliardë dollarë. Deri më tani këtë vit, Tesla ka humbur një të tretën e vlerës së saj. Prodhuesi i automjeteve ka fabrika prodhuese në Kaliforni, Nevada, Nju Jork dhe Teksas në SHBA, si dhe fabrika në Gjermani dhe Kinë.
