Asqeri Mandri, 34-vjeçari që u arrestua dy ditë më parë për dhunë në familje, është lënë në burg nga Gjykata e Tiranës.
Mandri mbante nën monitorimin e kamerave bashkëshorten dhe fëmijët dhe në fjalën e tij përpara gjykatës ai ka mohuar që të ketë ushtruar dhunë ndaj saj.
34-vjeçari pranoi se kishte vendosur kamerat me pretendimin se donte të ruante familjen e tij pasi ndodhej emigrant në Gjermani.
Ai gjithashtu ka dëshmuar para togave të zeza se ka patur debate me bashkëshorten pasi ajo i ka thënë se do të ikte të punonte natën si roje.
“Kamerat i kam vendosur për të parë gruan dhe fëmijët pasi isha jashtë shtetit. Kemi patur debate por jo dhunë. Sherr nisi pasi gruaja më thoshte që do ikte të punonte natën si roje”, tha ai në gjykatë.
Vetë bashkëshortja e Mandrit ka dhënë para hetuesve dëshmi kontradiktore. Në një komunikim me gazetarët, më parë, ajo ka mohuar deklaratën që ka bërë në polici ku shprehej se prej disa kohësh dhunohej dhe mbahej e vëzhguar me kamera.
Ajo tha se kamerat i ka vendosur vetë dhe se nuk ka qenë asnjëherë e dhunuar nga i shoqi. Më pas ka qenë ajo e cila e ka denoncuar bashkëshortin dhe ka deklaruar të kundërtën në polici.
