Erion Veliaj ka paralajmëruar sot kompanitë e transportit në Tiranë se do të humbasin licencën nëse nuk nisin menjëherë shërbimin.
Në një kohë që transporti publik, në Tiranë ka mbetur pezull pas kushteve të vendosura nga Shoqata e Transportit, kryetari i Bashkisë ka kërcënuar operatorët me heqje licence nëse nuk nisin punën.
“Bashkia e Tiranës i ka plotësuar të gjitha kërkesat e kompanive të autobusëve. Mund të vazhdojnë debatet me ministrinë, edhe unë dua të vazhdoj një diskutim me ministrinë sepse duhen subvencionuar studentët, duhen subvencionuar personat me aftësi të kufizuara, duhen subvencionuar veteranët; por, ky diskutim mund të vazhdojë fare mirë duke nisur punë. Unë do të jem avokati i tyre, por në momentin kur ata thonë: ‘O të gjitha, o rashë e vdiqa’, ju garantoj se disa kompani do humbasin licencën e transportit në Bashkinë e Tiranës”, u shpreh ai.
Kreu i Bashkisë nënvizoi se nuk do të ketë asnjë tolerim për askënd që tenton të bllokojë qytetin dhe prova për këtë është Unaza dhe Teatri, ku puna po vijon.
“Kush i vë në dyshim këto që po them, le të kthehet te Astiri ose te Teatri dhe të shohin a e mbajmë apo jo. Ne jemi qytetarë sepse zgjedhim të flasim si qytetarë dhe të sillemi si qytetarë. Por, kur dikush bllokon rrugën dy vjet, kur dikush bllokon teatrin dhe e zapton tre vjet, kur dikush thotë: ‘Nuk dua ta nxjerr autobusin’, ndërkohë që kërkesat i plotësohen 100%, kjo është të mbash qytetin peng. Këtë qytet nuk e ka mbajtur sot peng askush në këto 5 vite dhe kjo është arsyeja pse ky është paralajmërimi i fundit. Nëse operatorët nuk dalin, fare mirë humbasin licencën, e cila do të hidhet në treg dhe vjen e merr një operator tjetër”, deklaroi Veliaj, duke shtuar se në këtë periudhë sakrificash të gjithë duhet të bëjnë maksimumin.
Sektori i tranpsortit është një ndër më të prekurit në vend nga kriza ekonomike pas pandemisë. Administratorët e autobusëve këmbëngulin që të rimbursohen për të gjithë ata qytetarë që përfitojnë transport falas dhe për të gjitha vendet që do të rrinë bosh, pasi sipas protokollit, lejohet qarkullimi vetëm me 70% të kapacitetit.
Kërkesave të tyre iu shtohet gjithashtu edhe heqja e akcizës për naftën dhe për TVSH-në gjatë të gjithë vitit 2020:
“Nuk nisim punën pa u plotësuar 4 kërkesat tona. Kërkojmë heqjen e akcizës për naftën dhe të TVSH-së për 2020. 90 % e shoqatave që ne përfaqësojmë, nuk do të punojnë. Protokolli i sigurisë i pazbatueshëm, duhet të ndryshojë. Rimbursim për vendet që do jenë bosh për shkak të protokollit. Rimbursim në burim për ata që përfitojnë transportin falas”, mësohet të kenë thënë administratorët e autobusëve.
Ndërkohë, Transporti Publik Ndërqytetas u rihap më 23 qershor pas 3 muajsh i bllokuar. Por drejtuesit e autobusëve shprehen se kanë udhëtuar me fare pak pasagjerë në drejtim të Tiranës. Sipas tyre, nga një kapacitet me 20 pasagjere, mezi kane gjetur deri ne 4 persona, dhe kjo e bën të pamundur të udhëtojnë.
/Iconstyle.al
