Një ditëlindje si në ëndrra ka qenë 25-vjetori i këngëtares Xhensila Myrtezaj. Ai që e ka bërë të lumtur është bashkëshorti i saj Bes Kallaku, i cili kishte menduar një surprizë fantastike për nënën e ardhshme të vajzës së tij.
Fillimisht ishte Besi ai i cili që në orët e para të mëngjesit uroi bashkëshorten në Instagram, përmes një dedikimi mjaft emocionues. Si rrallëherë ai dukej mjaft romantik dhe na habiti me fjalët për “të bukurën” e tij:
“Urime ditëlindjen e bukura, e mira, e ëmbla, ditët e mia, jeta dhe familja ime që pres. Love ❤️ u”, shkruan Besi.
Më pas, Xhensila publikoi në profilin e saj surprizën e bukur. Besi kishte mbushur shtëpinë me lule dhe tullumbace në ngjyrë rozë. Këngëtarja nuk i fsheh dot emocionet teksa xhiron videon e përlotur:
“Besaruqe, por çfarë më ke bërë kështu”, shprehet ajo duke iu drejtuar Besit me përkëdheli.
Kudo shihen petale trëndafili që vijojnë edhe në shkallët që me siguri të çojnë në dhomën e gjumit të çiftit. Kjo është një ndër surprizat më të veçanta që Besi ka bërë për partneren e tij.
Çifti do të bëhet me një vajzë së shpejti. Vetëm pak kohë më parë Xhensila dhe Besi konfirmuan publikisht lajmin e shtatzënisë duke publikuar foto me barkun e rrumbullakosur dhe me dedikime mjaft emocionuese.
