Ditën e 6 janarit, besimtarët ortodoksë në qytetin e Fierit kanë festuar Ditën e Ujit të Bekuar, një nga ritualet më të shenjta të kalendarit fetar. Kisha e Shën Gjergjit organizoi hedhjen e kryqit në ujë në shatërvanin e sheshit “Europa”, ku ky akt është bërë një traditë e përvitshme.
Procesioni ka nisur me meshën në kishë, dhe më pas, besimtarët janë mbledhur në oborrin e kishës për të marrë ujin e bekuar, të cilin e konsiderojnë një burim mbarësie për familjet e tyre. Vargu i besimtarëve është drejtuar më pas drejt shatërvanit të qytetit, ku tre të rinj, sipas zakonit, janë hedhur në ujë për të marrë kryqin, duke sfiduar temperaturat e ulëta.
Në këtë ritual, 17-vjeçari Samuel Kola ishte ai që nxori kryqin nga uji për herë të parë, duke shprehur emocionet e tij pas fitores: “Është hera e parë që marr pjesë dhe fitova. Ndihem shumë i lumtur, falënderoj Zotin, familjen dhe shokët e mi të Rinisë Ortodokse në Fier,” tha ai. Pas nxjerrjes së kryqit, Samuel e dorëzoi atë Mitropolitit të Apolonisë dhe Fierit, Hirësisë së tij, Imzot Nikolla, dhe mori bekimin e tij.
Pavarësisht se këtë vit pjesëmarrja ishte më e ulët për shkak të ditës së punës pas festave, katekistja Ingrida Bida theksoi se shumë besimtarë kanë arritur të marrin pjesë në këtë ceremoni tradicionale, e cila mbetet një moment i rëndësishëm për komunitetin ortodoks në Fier.
