Sot, më 17 prill, në mbarë botën shënohet Dita Botërore e Hemofilisë, një ditë që ka për qëllim të rrisë ndërgjegjësimin mbi këtë sëmundje të rrallë të gjakut dhe sfidat me të cilat përballen personat që jetojnë me të.
Hemofilia është një çrregullim i trashëguar që ndikon në aftësinë e gjakut për t’u mpiksur normalisht, duke shkaktuar gjakderdhje të zgjatura që mund të jenë të rrezikshme për jetën. Mungesa e trajtimit të duhur mund të çojë në dëmtime të përhershme të kyçeve, organeve të brendshme dhe komplikacione të tjera serioze.
Kjo ditë përkujtohet çdo vit në nder të themeluesit të “World Federation of Hemophilia”, Frank Schnabel, dhe synon të nxisë përpjekjet globale për diagnostikim më të hershëm, trajtim më të mirë dhe akses të barabartë për të gjithë pacientët kudo në botë.
Në këtë ditë, ndërtesa ikonike në shumë qytete ndriçohen me ngjyrën e kuqe për të simbolizuar gjakun dhe për të treguar solidaritet me komunitetin e prekur nga hemofilia dhe çrregullime të tjera të rralla të gjakut.
