Presidenti i Ukrainës, Volodymyr Zelenskyy, ka premtuar se do të ndjekë pretendimet për krime lufte kundër forcave ruse në rajonet e pushtuara të vendit.
Gjatë një fjalimi të tij së fundmi, Zelenskyy tha se hetuesit do të bëjnë maksimumin për të identifikuar autorët e këtyre armiqësive.
“Po bëjmë gjithçka mundemi për të identifikuar stafin e ushtrisë ruse të përfshirë në këto krime. Do të jetë një punë e përbashkët e shtetit tonë me BE dhe institucionet ndërkombëtare, në veçanti Gjykatën Ndërkombëtare Kriminale. Të gjitha krimet e pushtuesit janë të dokumentuara. E gjithë baza procedurale e nevojshme do të përgatitet për të sjellë para drejtësisë ushtarët rusë fajtorë për çdo krim që kanë kryer”, tha Zelenskyy.
Udhëheqësi ukrainas ka shtuar se ka diskutuar statusin e hetimeve me Presidenten e KE-së, Ursula Von Der Leyen, Presidentin polak Andrzej Duda dhe kancelarin austriak Karl Nehammer.
Po ashtu, Presidenti i SHBA Joe Biden ka bërë thirrje që presidenti rus Vladimir Putin të gjykohet për krime lufte, në një kohë kur çdo ditë e më shumë po dalin në pah prova të mizorive që dyshohet se janë kryer nga forcat ruse në Ukrainë.
Ka një zemërim ndërkombëtar në rritje për vrasjen e pretenduar të civilëve në Bucha, një qytet pranë kryeqytetit Kiev.
“Ky njeri është brutal”, tha Biden për liderin rus, duke përsëritur se ai beson se Putin “është kriminel lufte”.
