Xhudistja e mirënjohur kosovare, Distria Krasniqi, ka ngritur lart edhe një herë flamurin e Kosovës, duke fituar medaljen e artë në Grand Prixin e Zagrebit, një ndër garat më prestigjioze të xhudos në botë. Në kategorinë deri në 52 kilogramë, kampionia olimpike tregoi dominim absolut nga ndeshja e parë deri në të fundit, duke dëshmuar edhe një herë se mbetet ndër emrat më të fortë në këtë peshë.
Në finalen e madhe, Krasniqi u përball me xhudisten e njohur hungareze Reka Pupp, një dueli ku pritej rivalitet i fortë. Megjithatë, garuesja dardane e kontrolloi luftën me qetësi dhe precizitet, duke triumfuar pas 2 minutash e 26 sekondash me një teknikë të pastër, që i siguroi asaj titullin.
Edhe rrugëtimi deri në finale ishte po aq imponues. Në raundin e dytë, Distria mposhti brazilianen Amanda Lima, duke kaluar me lehtësi në fazën tjetër. Në çerekfinale, ajo tregoi disiplinë të hekurt ndaj francezes Blandine Pont, të cilën e mbylli ndeshjen për 2 minuta e 50 sekonda. Më pas, në gjysmëfinale, italiania Gaia Stella u bë viktima e radhës, me Krasniqin që siguroi fitoren brenda 2 minutash e 3 sekondash, duke kaluar bindshëm në finalen vendimtare.
Kjo medalje e artë nuk është as surprizë dhe as rastësi për 29-vjeçaren, e cila tashmë numëron 8 medalje të arta në nivel Grand Prixi, duke e forcuar statusin e saj si një prej ikonave më të mëdha të sportit kosovar dhe botëror.
